जळगाव: पुण्यात सैन्य प्रशिक्षण घेत असताना जखमी झालेल्या कॅप्टन प्रथम महाले यांचा उपचारादरम्यान मृत्यू झाला आहे. त्यांच्या मृत्यूच्या बातमीनंतर जळगाव जिल्ह्यातील चाळीसगाव तालुक्यात शोककळा पसरली आहे.
जळगावच्या चाळीसगाव तालुक्यातील सायगाव येथील कॅप्टन प्रथम महाले हे नुकताच भारतीय सैन्यात भरती झाले होते. भरतीनंतर पुण्यातील खडकवासला येथे सैन्य प्रशिक्षण केंद्रात प्रशिक्षण घ्यायला सुरुवात झाली. दरम्यान बॉक्सिंग खेळत असताना त्यांना गंभीर दुखापत झाली होती. यानंतर त्यांच्यावर पुण्याच्या सैन्य रुग्णालयात उपचार सुरू होते. मात्र, उपचार दरम्यान त्यांचा मृत्यू झाला आहे .
शासकीय इतमामात अंत्यसंस्कार
ही घटना दोन दिवसांपूर्वी घडली होती. प्रथम महाले यांच्यावर त्यांच्या मूळ गावी म्हणजेच चाळीसगाव तालुक्यातील सायगाव येथे शासकीय इतमामात अंत्यसंस्कार पार पडले. अंत्य संस्कारासाठी हजारो ग्रामस्थ यावेळी उपस्थित होते. सैन्यदलात भरती झाल्यानंतर भावी काळात लेफ्टनंट कर्नल पदाची स्वप्ने पाहणाऱ्या जवानाचा असा दुर्दैवी मृत्यू झाल्याने एकच हळहळ व्यक्त केली जात आहे.
