मालेगाव: पुण्याहून (Accident News) निघालेल्या खाजगी बसचा मालेगाव-मनमाड महामार्गावर भीषण अपघात झाला. पुण्याहून मालेगावकडे निघालेली एक खाजगी ट्रॅव्हल्स बस आणि पिकअप व्हॅन यांच्यात झालेल्या जोरदार धडकेत ४ प्रवाशांचा जागीच मृत्यू झाला आहे. या अपघातात २२ जखमी झाले असून, त्यापैकी दोघांची प्रकृती अत्यंत चिंताजनक आहे.
वऱ्हाणे गावाजवळ हा भीषण अपघात पहाटे ३ च्या सुमारास झाला. गाढ झोपेत असलेल्या प्रवाशांना काही समजण्यापूर्वीच दोन्ही वाहनांची समोरासमोर धडक झाली. अपघातानंतर बसमध्ये एकच किंचाळ्या आणि आरडाओरड सुरू झाली. स्थानिकांनी तातडीने घटनास्थळाकडे धाव घेत बचावकार्य सुरू केले.
पोलिसांना अपघाताची माहिती देताच पोलिस घटनास्थळी दाखल झाले. स्थानिक ग्रामस्थ आणि पोलिसांनी बसमध्ये अडकलेल्या प्रवाशांना खिडक्या तोडून बाहेर काढले. जखमींना जवळच्या रुग्णालयात दाखल करण्यात आले आहे. पोलिसांच्या मते, पहाटेच्या वेळी झोपेत चालकाचे वाहनावरील नियंत्रण सुटल्याने हा अपघात झाला असावा, असा अंदाज वर्तवण्यात येत आहे. दरम्यान, पोलिस अधिक तपास करत आहेत.
