जालना : मराठा आरक्षणाच्या मागणीसाठी आंदोलन करणारे मनोज जरांगे यांच्या अडचणींमध्ये आणखी एका तक्रारीची भर पडली आहे. त्यांच्या आंदोलनात यापूर्वी सक्रिय असलेल्या ललिता तारख यांनी मनोज जरांगे आणि त्यांच्या समर्थकांविरोधात अंबड पोलीस ठाण्यात तक्रार दाखल केली आहे. सोशल मीडियावर अश्लील शिवीगाळ करणे, एआयच्या माध्यमातून अश्लील फोटो आणि व्हिडीओ तयार करून बदनामी करणे तसेच धमक्या देणे, असे आरोप त्यांनी केले आहेत. या प्रकरणात पोलिसांनी तातडीने कारवाई करावी, अशी मागणी त्यांनी केली आहे.
ललिता तारख या यापूर्वी मनोज जरांगे यांच्या मराठा आंदोलनात सक्रिय होत्या. मात्र, आता त्यांनी जरांगे यांच्या भूमिकेविरोधात भूमिका घेतल्याचे दिसत आहे. सोशल मीडियावर आपल्याबाबत विविध प्रकारचे आरोप केले जात असल्याचे त्यांनी म्हटले आहे. आपण पैसे घेतले, आपल्याला किती लाखांचे पॅकेज मिळाले, प्लॉट घेतला का, अशा स्वरूपाचे प्रश्न आणि आरोप सोशल मीडियावर केले जात असल्याचा दावा तारख यांनी केला.
या पार्श्वभूमीवर २०२३ पासून आपल्या तसेच संबंधित व्यक्तींच्या संपत्तीची चौकशी करण्यात यावी, अशी मागणी त्यांनी केली आहे. चौकशी झाल्यानंतर कोणाच्या संपत्तीत किती वाढ झाली, हे स्पष्ट होईल, असेही त्यांनी म्हटले आहे. तसेच सोशल मीडियावर अश्लील कमेंट करणाऱ्यांनी आपल्या कुटुंबातील महिला सदस्यांचाही विचार करावा, असे आवाहन त्यांनी केले.
ललिता तारख यांनी या प्रकरणाची सखोल चौकशी करण्याची मागणी सुनेत्रा पवार, देवेंद्र फडणवीस आणि एकनाथ शिंदे यांच्याकडे केली आहे. सत्य समोर येण्याची वेळ आल्यावर आपण सर्व माहिती बोलू, असा इशाराही त्यांनी दिला आहे. दरम्यान, मनोज जरांगे यांनी २९ ऑगस्ट रोजी अंतरवली सराटी येथे उपोषण सुरू केले होते. त्यानंतर ते मुंबईच्या दिशेने रवाना झाले होते. मात्र, प्रकृती खालावल्याने बीड जिल्ह्यातील पाटोदा येथे त्यांनी उपोषण स्थगित केले होते. त्यानंतर त्यांच्या आंदोलनाशी संबंधित व्यक्तींवर विविध प्रकरणांमध्ये कारवाई आणि चौकशी होत असल्याने मराठा आंदोलनाच्या वर्तुळात चर्चेला उधाण आले आहे.
