छत्रपती संभाजीनगर: छत्रपती संभाजीनगरमध्ये २१ ते २३ ऑगस्ट २०२६ या कालावधीत ‘जिगीषा नाट्यसहवास’ या नाट्यमहोत्सवाचे आयोजन करण्यात आले आहे. मराठवाडा आर्ट कल्चर अँड फिल्म फाउंडेशन आणि महात्मा गांधी मिशन यांच्या संयुक्त विद्यमाने हा महोत्सव चौथ्या वर्षी आयोजित केला जात असून, नाट्यप्रेमींसाठी विविध नाटके, मुलाखती, परिसंवाद आणि अभिवाचनाचे कार्यक्रम यामध्ये होणार आहेत.
महोत्सवाचे उद्घाटन २१ ऑगस्ट रोजी सायंकाळी एम.जी.एम. परिसरातील रुक्मिणी सभागृहात ज्येष्ठ अभिनेत्री रत्ना पाठक शाह यांच्या हस्ते होईल. यावेळी एम.जी.एम. विद्यापीठाचे कुलपती अंकुशराव कदम आणि फाउंडेशनचे विश्वस्त नंदकिशोर कागलीवाल उपस्थित राहतील. उद्घाटनानंतर ‘हॅनाची सुटकेस’ या नाटकाचा प्रयोग सादर करण्यात येणार आहे.
यावर्षी प्रथमच ‘मिलिंद सफई पुरस्कार’ प्रदान करण्यात येणार असून, रंगभूमीवर सातत्याने योगदान देणारे अभिनेते आणि लेखक योगेश शिरसाठ यांना हा सन्मान दिला जाणार आहे. याच दिवशी नाट्यविषयक पुस्तक प्रदर्शनाचे उद्घाटनही होईल. विविध नामांकित प्रकाशनांच्या नाट्यसंहिता, आत्मचरित्रे आणि नाट्यसाहित्य रसिकांसाठी उपलब्ध असणार आहे.
२२ ऑगस्ट रोजी रत्ना पाठक शाह यांची प्रकट मुलाखत आयोजित करण्यात आली आहे. त्यानंतर ‘साहित्य ते नाटक : माध्यम रुपांतर’ या विषयावर परिसंवाद होईल. संध्याकाळी ‘सवाल-जवाब’ या नाटकाचा प्रयोग सादर केला जाणार असून, अभिव्यक्ती स्वातंत्र्य या विषयावर ते भाष्य करणार आहे.
महोत्सवाच्या अंतिम दिवशी प्रा. अजित दळवी यांची प्रकट मुलाखत होईल. त्यानंतर ‘उमगलेले गांधी’ या अभिवाचन कार्यक्रमातून महात्मा गांधींच्या विचारांवर आधारित निवडक लेखांचे सादरीकरण केले जाईल. या कार्यक्रमात रोहिणी हट्टंगडी, दीपक राजाध्यक्ष, चंद्रकांत कुलकर्णी यांच्यासह इतर मान्यवर सहभागी होतील. संध्याकाळी ‘बरड’ या नाटकाच्या प्रयोगाने महोत्सवाचा समारोप होणार आहे.
शहरात चित्रपट महोत्सवाप्रमाणेच ‘जिगीषा नाट्यसहवास’मुळेही सांस्कृतिक चळवळीला बळ मिळत असल्याचे आयोजकांनी सांगितले असून, अधिकाधिक नाट्यरसिकांनी या महोत्सवाला उपस्थित राहावे, असे आवाहन करण्यात आले आहे.
