छत्रपती संभाजीनगर: छत्रपती संभाजीनगरातील सातारा परिसरात एका 24 वर्षीय महिलेची लग्नाचे आमिष दाखवून फसवणूक केल्याचा धक्कादायक प्रकार समोर आला आहे. सहकाऱ्याशी प्रेमसंबंध जुळल्यानंतर महिलेने त्याच्यावर विश्वास ठेवून स्वतःचा संसार मोडला. आरोपीने तिच्या होणाऱ्या बाळाची जबाबदारी स्वीकारण्याचे, त्याला स्वतःचे नाव देण्याचे आणि तिच्याशी लग्न करण्याचे आश्वासन दिले. या विश्वासाचा फायदा घेत त्याने वारंवार शारीरिक संबंध ठेवल्याचा आरोप करण्यात आला आहे. नंतर तो संपर्क तोडून बसला. या प्रकरणी सातारा पोलिस ठाण्यात शाहिद कय्युम सय्यद (वय 27, रा. लक्ष्मी कॉलनी, शिवाजीनगर) याच्याविरुद्ध बलात्काराचा गुन्हा दाखल करण्यात आला आहे.
पोलिसांनी दिलेल्या माहितीनुसार, 2024 मध्ये क्रांतीचौक परिसरातील एका दुचाकी शोरूममध्ये काम करत असताना दोघांची ओळख झाली. काही दिवसांतच त्यांचे प्रेमसंबंध जुळले. त्या वेळी महिला विवाहित होती आणि दोन महिन्यांची गर्भवती होती. प्रेमसंबंधामुळे तिच्या वैवाहिक आयुष्यात वाद वाढले आणि अखेर ती पतीपासून वेगळी राहू लागली.
फिर्यादीनुसार, महिला मैत्रिणीकडे राहत असताना आरोपीने तिचा आणि होणाऱ्या बाळाचा सांभाळ करण्याचे, मुलाला स्वतःचे नाव देण्याचे आणि लग्न करण्याचे आश्वासन दिले. त्याच्या या बोलण्यावर विश्वास ठेवून महिलेने त्याच्याशी शारीरिक संबंध ठेवले. नंतर तिचा पतीशी अधिकृत घटस्फोट झाला आणि काही महिन्यांनी तिने मुलीला जन्म दिला. त्यानंतरही आरोपी लग्नाचे आश्वासन देत तिच्याकडे येत राहिला आणि अनेक वेळा शारीरिक संबंध ठेवल्याचे तक्रारीत नमूद करण्यात आले आहे.
मात्र काही दिवसांनी आरोपीने अचानक संपर्क तोडला. चौकशी केल्यानंतर तो स्वतःही विवाहित असल्याचे महिलेच्या लक्षात आले. त्याने ना तिची विचारपूस केली, ना तिच्या मुलीची जबाबदारी स्वीकारली. आपली फसवणूक झाल्याचे लक्षात आल्यानंतर पीडितेने सातारा पोलिस ठाण्यात तक्रार दाखल केली. त्यानुसार पोलिसांनी गुन्हा नोंदवून पुढील तपास सुरू केला आहे.
