यवत, ता. २७ : दहा हजार रुपयांच्या आर्थिक व्यवहारातून सुरू झालेला वाद थेट मारहाणीपर्यंत पोहोचला. गायी घेऊन जाण्याच्या वादातून एका मजुराच्या डोक्यात लाकडी काठीने वार करून गंभीर जखमी केल्याची घटना घडली आहे. हि घटना कानगाव (ता. दौंड) येथे २१ जून रोजी सकाळी साडेआठच्या सुमारास घडली आहे. याप्रकरणी तिघांविरुद्ध यवत पोलिस ठाण्यात गुन्हा दाखल करण्यात आला आहे.
याप्रकरणी महमंद फत्तुभाई शेख (वय ४४, रा. कानगाव, ता. दौंड) यांनी फिर्याद दिली आहे. त्यानुसार अमित गुलाब मेमाणे (रा. इनामदारवस्ती, उरुळी कांचन, ता. हवेली) तसेच त्याच्या दोन अनोळखी साथीदारांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी महमंद शेख हे घरी असताना शेजारी राहणाऱ्या गणेश ससाणे यांनी त्यांच्या वाड्यात भांडण सुरू असल्याची माहिती दिली. त्यानंतर ते घटनास्थळी गेले असता त्यांची आई कमरूनिसा व पुतणी सानिया यांच्याशी अमित गुलाब मेमाणे व त्याचे दोन साथीदार गायी घेऊन जाण्याच्या कारणावरून वाद घालत होते.
यावेळी फिर्यादी यांनी वादाचे कारण विचारले असता, त्यांच्या भावाने रफिक शेख याने दहा हजार रुपये घेतले असून ते परत न दिल्याने गायी घेऊन जाण्यास आल्याचे संबंधितांनी सांगितले. फिर्यादी यांनी रफिक घरी आल्यानंतर येण्यास सांगितल्याने आरोपी संतप्त झाले. त्यातून शाब्दिक वाद होऊन आरोपींनी शिवीगाळ व धक्काबुक्की केली.
दरम्यान, आरोपी अमित गुलाब मेमाणे याने तेथे पडलेली लाकडी काठी उचलून फिर्यादीच्या डोक्यात जोरदार प्रहार केला. या हल्ल्यात त्यांच्या डोक्याला गंभीर दुखापत होऊन रक्तस्राव सुरू झाला. जखमी अवस्थेत ते खाली कोसळताच आरोपी घटनास्थळावरून पसार झाले.जखमी महमंद शेख यांना प्रथम पाटस पोलिस चौकीत नेण्यात आले. त्यानंतर उपजिल्हा रुग्णालय, दौंड येथे प्राथमिक उपचार करण्यात आले. प्रकृती गंभीर असल्याने त्यांना पुढील उपचारासाठी बारामती येथील मेडिकल कॉलेजमध्ये हलविण्यात आले.
उपचारानंतर फिर्यादी महमंद शेख यांनी यवत पोलिस ठाण्यात तक्रार दाखल केली. त्यानुसार अमित गुलाब मेमाणे तसेच त्याच्या दोन अनोळखी साथीदारांविरुद्ध भारतीय न्याय संहिता (BNS) कलम ११८(१), ११५(२), ३५२, ३५१(२) आणि ३(५) अन्वये गुन्हा दाखल करण्यात आला आहे. पुढील तपास सहाय्यक फौजदार जाधव करीत आहेत.
