नांदेड: नांदेड जिल्ह्यातील (Nanded Crime) मुखेड तालुक्यात (Nanded News) थरारक घटना उघडकीस आली आहे. पत्नीवर वाईट नजरेने बघितल्याच्या संशयावरून एका 17 वर्षीय तरुणाचा खून करून प्रेत रस्त्याच्या कडेला टाकल्याचे समोर आले आहे. ही घटना दि. 2 ऑक्टोबर रोजी सकाळी उघडकीस आली. या प्रकरणी नायगाव पोलीसांनी आरोपीस अटक केली आहे.
मुखेड तालुक्यातील डोंगरगाव येथील जिशान लतिफ सय्यद (वय 17) आणि त्याच गावातील आब्बास रमजानसाब शेख यांच्यात मोहर्रमच्या काळात भांडण झाले होते. त्यावेळी आब्बास याने जिशानवर त्याच्या पत्नीकडे वाईट नजरेने पाहिल्याचा आरोप केला होता. मात्र नातेवाईकांनी तो वाद मिटवला आणि दोघे पुन्हा मित्र झाले.
दि. 1 ऑक्टोबर रोजी संध्याकाळी 6.30 वाजता जिशान मस्जिदमध्ये नमाज अदा करून बाहेर पडला. त्यावेळी तो आब्बासच्या मोटारसायकलवर बसून गेला होता. गावातील काही जणांनी त्याला आब्बाससोबत पाहिले होते. रात्री 7.30 वाजता जावई रहिम महेबुब नांदेडे यांनी जिशानला फोन केला असता तो “मी पेट्रोल आणायला बाहेर आलो आहे, घरी गेल्यानंतर फोन करतो” असे म्हणून फोन ठेवला. मात्र त्यानंतर तो घरी परतलाच नाही.
घरच्यांनी जिशानचा शोध सुरू केला. वडिलांनी आब्बास याला फोन करून विचारले असता त्याने काहीच माहिती नसल्याचे सांगितले. मात्र त्याच्या उडवाउडवीच्या उत्तरांमुळे संशय वाढला. दुसऱ्या दिवशी (दि. 2 ऑक्टोबर) सकाळी मुखेड पोलिसांना माहिती मिळाली की, नायगाव तालुक्यातील गडगा-कौठा रोडवर एक प्रेत आढळले आहे. फोटो दाखवण्यात आला असता तो जिशानचाच असल्याचे नातेवाईकांनी ओळखले.
जिशानच्या डोक्यात दगडाने मारल्याचे, तर छातीत चाकूने भोसकल्याचे दिसून आले. शिवाय त्याच्या अंगावरील कपडे आणि पोटाचा भाग अर्धवट जाळलेला होता. म्हणजेच खुनानंतर पुरावे नष्ट करण्याचा प्रयत्न झाला असल्याचे पोलिस तपासातून समोर आले. जिशानच्या वडिलांच्या फिर्यादीवरून नायगाव पोलीस ठाण्यात गुन्हा नोंदविण्यात आला आहे. या प्रकरणात मुख्य आरोपी आब्बास रमजानसाब शेख यास पोलिसांनी अटक केली आहे. घटनेचा पुढील तपास सुरू असून, पोलिसांकडून इतर संशयितांचा सहभाग होता का याची चौकशी केली जात आहे. ही घटना समोर आल्यानंतर मुखेड आणि परिसरात प्रचंड खळबळ उडाली असून, एका किरकोळ संशयावरून जीव घेण्यापर्यंत प्रकरण गेले याबाबत ग्रामस्थांमध्ये संताप व्यक्त होत आहे.
