बीड : मराठा आरक्षणाच्या मागणीसाठी बीडमधील आंदोलन आक्रमक होत आहे. काही तासांपूर्वी माजलगावचे आमदार प्रकाश सोळंके यांचे घर पेटवून देण्यात आले होते. त्यानंतर आता बीडच्या माजलगाव नगर परिषदेमध्ये देखील जाळपोळ करण्यात आली आहे. मराठा आरक्षणाची मागणी करत आलेल्या जमावाने माजलगाव नगर परिषदेमध्ये घुसत जाळपोळ केली. यानंतर नगरपरिषदेच्या इमारतीमध्ये मोठी आग लागली आहे. त्यामुळे सध्या बीड जिल्ह्यात आरक्षणाचा मुद्दा प्रचंड तापला असून, आंदोलन अधिक आक्रमक होत आहेत.
बीड जिल्ह्यातील आमदार प्रकाश सोळंके यांच्या घरावर दगडफेक करत जाळपोळ केल्याची घटना समोर आली होती. त्यानंतर जाळपोळ करणारा जमाव थेट माजलगाव नगर परिषदेत पोहचला आहे. या जमावाने नगर परिषदेत मोठ्या प्रमाणावर जाळपोळ केली आहे. त्यामुळे नगर परिषदेला मोठी आग पाहायला मिळत आहे. सदर घटनेची माहिती मिळताच पोलीस देखील घटनास्थळी दाखल झाले आहेत. सध्या माजलगाव शहरात तणावाचे वातावरण पाहायला मिळत आहे.
