जळगाव : रेशन कार्ड तयार करून देण्याचे आमिष दाखवत ३० वर्षीय महिलेकडे शरीरसुखाची मागणी केल्याचा धक्कादायक प्रकार जळगाव शहरात उघडकीस आला आहे. या प्रकरणी शहर पोलीस ठाण्यात गुन्हा दाखल करण्यात आला असून संशयिताला अटक करण्यात आली आहे.
पोलिसांनी दिलेल्या माहितीनुसार, पीडित महिलेला रेशन कार्ड तयार करायचे होते. त्यावेळी तिची ओळख सुनील पाटील याच्याशी झाली. रेशन कार्ड लवकर करून देण्याचे आश्वासन देत त्याने महिलेला तहसील कार्यालयाजवळ भेटण्यासाठी बोलावले.
महिलेच्या तक्रारीनुसार, भेटीदरम्यान सुनील पाटील याने तिच्याशी अयोग्य वर्तन करत शरीरसुखाची मागणी केली. या प्रकारामुळे महिला घाबरली असून तिने घडलेला प्रकार कुटुंबीयांना सांगितला.
यानंतर काही महिलांनी एकत्र येऊन संशयिताला जाब विचारला. त्यावेळी दोन्ही बाजूंमध्ये वाद झाला आणि संतप्त महिलांनी त्याला मारहाण केल्याचे सांगितले जात आहे. या घटनेचा व्हिडिओ सोशल मीडियावर व्हायरल झाला आहे.
घटनेची माहिती मिळताच शहर पोलीस घटनास्थळी दाखल झाले. पीडित महिलेच्या तक्रारीवरून सुनील पाटील याच्याविरुद्ध विनयभंगासह संबंधित कलमांनुसार गुन्हा दाखल करण्यात आला असून पोलिसांनी त्याला अटक केली आहे.
या प्रकरणाचा पुढील तपास शहर पोलीस करत आहेत.
