बीड: बीड जिल्ह्यात लाचलुचपत प्रतिबंधक विभागाने (एसीबी) मोठी कारवाई करत विभागीय वन अधिकारी श्रीनिवास लखमावाड यांना 45 लाख रुपयांची लाच स्वीकारताना रंगेहात अटक केली. या कारवाईमुळे जिल्ह्याच्या प्रशासकीय वर्तुळात मोठी खळबळ उडाली आहे.
उपमुख्यमंत्री तथा बीडच्या पालकमंत्री सुनेत्रा पवार या दोन दिवसीय दौऱ्यावर असून, शुक्रवारी त्यांच्या अध्यक्षतेखाली जिल्हा नियोजन समितीची बैठक पार पडली. बैठकीत जिल्ह्याच्या विकासकामांचा आढावा घेण्यात आला तसेच विविध विभागांच्या अधिकाऱ्यांना आवश्यक सूचना देण्यात आल्या. या बैठकीला विभागीय वन अधिकारी श्रीनिवास लखमावाड हेही उपस्थित होते.
बैठक संपल्यानंतर श्रीनिवास लखमावाड आपल्या राहत्या घरी गेले. त्यानंतर लाचलुचपत प्रतिबंधक विभागाने पूर्वनियोजित सापळा रचत त्यांच्या निवासस्थानी छापा टाकला. यावेळी 45 लाख रुपयांची लाच स्वीकारताना एसीबीच्या पथकाने त्यांना रंगेहात पकडले. कारवाईनंतर त्यांना ताब्यात घेण्यात आले असून, पुढील कायदेशीर प्रक्रिया सुरू करण्यात आली आहे.
या प्रकरणात संबंधित लाचेची मागणी नेमकी कोणत्या कामासाठी करण्यात आली होती, तसेच या व्यवहारात आणखी कोणी सहभागी आहे का, याचा तपास एसीबीकडून सुरू आहे. या कारवाईनंतर जिल्ह्यातील प्रशासकीय अधिकाऱ्यांमध्ये एकच खळबळ उडाली असून भ्रष्टाचाराविरोधातील ही महत्त्वाची कारवाई मानली जात आहे.
गेल्या काही महिन्यांत राज्यभरात एसीबीकडून लाचखोरीविरोधात सातत्याने कारवाया केल्या जात आहेत. विविध सरकारी विभागांतील अधिकारी आणि कर्मचाऱ्यांना लाच स्वीकारताना रंगेहात अटक करण्यात आली आहे. बीडमधील ही कारवाई त्याच मालिकेतील आणखी एक मोठी कारवाई मानली जात असून, भ्रष्टाचाराविरोधात कठोर भूमिका घेतल्याचा स्पष्ट संदेश या निमित्ताने देण्यात आल्याची चर्चा आहे.
