बीड: देशभरात गाजत असलेल्या NEET पेपरफुटी प्रकरणात सीबीआयने तपासाचा वेग वाढवला असून महाराष्ट्रातील अनेक आरोपींवर कारवाई सुरू आहे. नाशिक, पुणे, लातूर आणि बीडमधून अनेकांना अटक करण्यात आली असून काही आरोपी सध्या न्यायालयीन कोठडीत आहेत. या पार्श्वभूमीवर पेपरफुटी प्रकरणातील आरोपी प्रा. पी. व्ही. कुलकर्णी यांच्या बीडमधील बांधकामावरही प्रशासनाने कारवाई सुरू केली आहे. (NEET Paper Leak)
बीड शहरातील शाहूनगर परिसरात कुलकर्णी यांचे चार मजली बांधकाम सुरू होते. या बांधकामातील कथित अनियमिततेबाबत नगरपालिका प्रशासनाने संबंधितांना नोटीस बजावली होती. नोटीसची मुदत संपल्यानंतर अखेर या बांधकामावर पाडकामाची कारवाई सुरू करण्यात आली. विशेष म्हणजे संबंधित ठेकेदाराकडूनच हे बांधकाम पाडण्यात येत असल्याची माहिती समोर आली आहे.
NEET पेपरफुटी प्रकरणात 22 लाखांहून अधिक विद्यार्थ्यांच्या भवितव्याशी खेळ झाल्याचा आरोप आहे. या प्रकरणात सेवानिवृत्त प्राध्यापक पी. व्ही. कुलकर्णी यांचे नाव समोर आल्यानंतर सीबीआयने त्यांना अटक केली होती. कुलकर्णी हे मूळचे बीड जिल्ह्यातील असून त्यांच्याविरोधातील तपास अधिक व्यापक करण्यात आला आहे.
दरम्यान, लातूरमधील आरसीसी क्लासेसचे प्रा. शिवराज मोटेगावकर आणि प्रा. पी. व्ही. कुलकर्णी यांना न्यायालयाने 10 जूनपर्यंत न्यायालयीन कोठडी सुनावली आहे. तपासादरम्यान काही धक्कादायक माहिती समोर आली असून लातूरमधील बालरोगतज्ज्ञ डॉ. मनोज शिरुरे यांच्या फ्लॅटवर कुलकर्णी विद्यार्थ्यांचे विशेष वर्ग घेत असल्याचे तपासात उघड झाले आहे. तसेच काही ठिकाणी ‘प्लॅटिनम गोल्ड बॅच’च्या माध्यमातून विद्यार्थ्यांकडून मोठ्या प्रमाणात शुल्क आकारले जात असल्याची माहितीही समोर आली आहे.
सीबीआय सध्या कुलकर्णी, मोटेगावकर आणि इतर आरोपींमधील आर्थिक व्यवहार तसेच परस्पर संबंधांचा सखोल तपास करत आहे. या प्रकरणातील आणखी काही महत्त्वाचे खुलासे पुढील तपासातून समोर येण्याची शक्यता व्यक्त केली जात आहे.
