Chhatrapati Sambhajinagar: छत्रपती संभाजीनगर : करमाड (Karmad) पोलीस ठाण्याच्या हद्दीतील फेरान जळगाव येथे गांजाची बेकायदेशीर लागवड आणि विक्री सुरू असल्याची माहिती मिळाल्यानंतर ग्रामीण पोलिसांच्या स्थानिक गुन्हे शाखेने कारवाई करत एकाला अटक केली आहे. या प्रकरणामुळे परिसरात खळबळ उडाली आहे.
पोलिसांनी दिलेल्या माहितीनुसार, स्थानिक गुन्हे शाखेचे पोलिस निरीक्षक विजयसिंग राजपूत यांना सोमवारी गोपनीय माहिती मिळाली होती. फेरान जळगाव येथील एका शेतात इतर पिकांमध्ये गांजाची रोपे लावून लागवड केली जात असल्याचे समोर आले होते. संशय टाळण्यासाठी ही लागवड पिकांच्या आड करण्यात येत असल्याची माहिती होती.
या माहितीच्या आधारे राजपूत यांच्या नेतृत्वाखाली पथकाने संबंधित शेतावर छापा टाकला. तपासणीदरम्यान शेतात गांजाची रोपे आढळून आली. पोलिसांनी संजय एकनाथ जाधव, वय 43, रा. फेरान जळगाव याला ताब्यात घेतले. घटनास्थळावरून 34.209 किलो ओला व सुका गांजा जप्त करण्यात आला.
ही कारवाई पोलिस अधीक्षक विनयकुमार राठोड आणि अतिरिक्त पोलिस अधीक्षक अन्नपूर्णा सिंह यांच्या मार्गदर्शनाखाली करण्यात आली. आरोपीविरुद्ध करमाड पोलीस ठाण्यात गुन्हा दाखल करण्यात आला असून पुढील तपास सुरू आहे.
या कारवाईत पीएसआय महेश घुगे तसेच पोलीस कर्मचारी बळीराम काकडे, कडूबा थोटे, संतोष पाटील, सचिन राठोड, सुनील गोरे, प्रमोद पाटील, दत्ता मुंडे, सचिन सोनार, अंगद तिडके, विजय धुमाळ, बलवीरसिंग बहुरे, शिवाजी मगर आणि हरिभाऊ कोळगे यांनी सहभाग घेतला.
