छत्रपती संभाजीनगर : छत्रपती संभाजीनगर जिल्ह्यातील वाळूज भागात एक धक्कादायक घटना उघडकीस आली आहे. बाहेर पतीचे अनैतिक संबंध असल्याचे समजल्यावर पत्नीने पतीला समजवण्याचा प्रयत्न केला. याच रागातून पत्नीला पतीने बेदम मारहाण केली. दरम्यान, गंभीर जखमी झालेल्या या महिलेचा उपचारादरम्यान मृत्यू झाला.
प्रियंका संदिप राऊत (वय 28) असे मयत महिलेचे नाव आहे. तर, संदीप राऊत (वय 30) असे आरोपी पतीचे नाव आहे. ही घटना वाळूज परिसरातील रांजणगाव येथे घडली आहे. (Chhatrapati Sambhaji Nagar)
मिळालेल्या अधिक माहितीनुसार, प्रियंका हिचा विवाह 2019 मध्ये संदिप राऊत याच्यासोबत झाला होता. काही वर्षांपूर्वी संदीप आणि प्रियंका हे छत्रपती संभाजीनगर जिल्ह्यातील गंगापूर तालुक्यातील रांजणगांव येथे गजानन ढेरे यांच्या घरात भाडे करारावर राहत होते.
या काळात संदिप राऊत याचे रांजणगांव (शे.पु.) परिसरात राहणाऱ्या एका महिलेसोबत प्रेमसंबंध सुरू होते. विशेष म्हणजे याबाबत खुद्द संदीप यानेच आपल्या पत्नीला याची माहिती दिली. तसेच मी त्या महिलेसोबतच राहणार आणि तुला सोडून देणार म्हणून गेल्या काही दिवसापासून प्रियंकाशी वाद घालून नेहमी मारहाण करत होता. तसेच, तिला जीवे मारण्याच्या धमक्या देखील देत होता.
दरम्यान, शुक्रवारी 1 डिसेंबर रोजी दुपारी एक वाजण्याच्या सुमारास संदिप राऊत याने सासू विमलबाई डेरे यांना फोन करुन सांगितलं होतं की, माझं आणि प्रियांकाच भांडण झालं आहे. प्रियंकाला तुमच्या घरी घेवून जा, मला तिच्या सोबत राहायचं नाही. त्यानंतर विमलबाई यांना सायंकाळी सहा वाजण्याच्या सुमारास प्रियंकाचा फोन आला तेव्हा ती मध्यवर्ती बसस्थानकावर होती.
तिचा भाऊ तिला घेण्यासाठी गेला असता तिनं सांगितलं की, मला नवऱ्याने लाथा बुक्क्यांनी तसेच स्टीलच्या झाऱ्यान खूप मारलं आहे. मला त्रास होत आहे, अस म्हणल्यामुळे तिला रुग्णालयात दाखल करण्यात आलं, मात्र डॉक्टरांनी तपासणी केली असता तिला मयत घोषित करण्यात आलं. या प्रकरणी प्रियंकाचा भाऊ आनंद गणेश डेरे यांनी वाळूज एमआयडीसी पोलीस ठाण्यात तक्रार केली असून आरोपी संदिप रामदास राऊत याच्या विरोधात खुनाचा गुन्हा दाखल करण्यात आला आहे.(Chhatrapati Sambhaji Nagar Crime)
