नांदेड: नांदेडमधील इतवारा परिसरात गेल्या वर्षी २५ नोव्हेंबर २०२५ रोजी झालेल्या ऑनर किलिंगच्या घटनेने संपूर्ण महाराष्ट्र हादरून गेला होता. १९ वर्षीय तरुण सक्षम ताटे याला त्याच्या प्रेयसीच्या नातेवाईकांनी अतिशय क्रूरपणे संपवले होते. लग्नाची चर्चा करण्याचे आमिष दाखवून त्याला बोलावले गेले, आदरातिथ्य केले गेले आणि त्यानंतर निर्घृणपणे तीन गोळ्या झाडून व डोके ठेचून त्याची हत्या करण्यात आली.
सक्षमच्या हत्येनंतर प्रेयसी आंचल हिने सक्षमच्या मृतदेहाशी लग्न करण्याचा निर्णय घेऊन सर्वांचे लक्ष वेधले होते. तिने सक्षमच्या आईला “आता मीच तुमचा मुलगा आहे आणि तुमची काळजी घेईन” अशी शपथ घेऊन सून म्हणून राहण्याचे वचन दिले होते.
मात्र, आता ७ महिने उलटल्यानंतर या घटनेचे एक वेगळे आणि दुर्दैवी वास्तव समोर आले आहे. सक्षमची आई संगीता ताटे यांनी नुकत्याच एका मुलाखतीत दु:ख व्यक्त केले. त्यांच्या माहितीनुसार, आंचल काही महिने त्यांच्यासोबत राहिली, पण अचानक एका दिवशी आजीची तब्येत खराब असल्याचे निमित्त सांगून ती घराबाहेर पडली आणि पुन्हा कधीच परतली नाही. संगीता ताटे यांनी तिला तिच्या घरापर्यंत सोडले होते, त्यानंतर ती कुठे गेली माहित नाही.
दरम्यान, मुलाच्या मृत्यूच्या धक्क्यातून सक्षमचे वडील सावरू शकले नाहीत आणि ३ महिन्यांपूर्वी त्यांचाही प्रकृती बिघडल्याने मृत्यू झाला. आता सक्षमच्या घरात त्याची आई संगीता ताटे या एकट्याच राहतात. आंचलसोबत आता कोणताही संपर्क नसल्याचे त्यांनी सांगितले. एका प्रेमप्रकरणाच्या दुर्दैवी अंतामुळे एका सुखी कुटुंब उध्वस्त झाले.
