रत्नागिरी: शहरात माणुसकीला काळिमा फासणारी एक संतापजनक घटना (Shocking News) समोर आली आहे. एका अल्पवयीन मुलावर अनैसर्गिक लैंगिक अत्याचार करून त्या कृत्याचा व्हिडीओ (Crime News) सोशल मीडियावर व्हायरल केल्याप्रकरणी रत्नागिरी शहर पोलिसांनी दोन तरुणांना अटक केली आहे. या किळसवाण्या प्रकारामुळे संपूर्ण जिल्ह्यात तीव्र संताप व्यक्त केला जात आहे. (Ratnagiri News)
मिळालेल्या माहितीनुसार, ही घटना २२ फेब्रुवारी २०२६ रोजी रत्नागिरी शहरातील राजिवडा परिसरात घडली. जुबेर सलीम शेख (वय २२) आणि मुस्तकीन गडकरी (वय २४) अशी अटक करण्यात आलेल्या आरोपींची नावे आहेत. या दोघांनी एका अल्पवयीन बालकाला गाठून त्याच्यावर अनैसर्गिक अत्याचार केले. पीडित मुलगा या घटनेमुळे प्रचंड दहशतीखाली होता, परिणामी त्याने सुरुवातीला हा प्रकार कोणालाही सांगितला नव्हता.
आरोपींनी केवळ अत्याचार करूनच थांबले नाहीत, तर त्यांनी या घृणास्पद कृत्याचा व्हिडीओ तयार केला आणि तो सोशल मीडियावर प्रसारित केला. १२ मार्च रोजी पीडित मुलाच्या वडिलांच्या निदर्शनास हा व्हिडीओ आला. व्हिडीओमधील मुलगा आपलाच असल्याचे पाहून त्यांना मोठा धक्का बसला. परिस्थितीचे गांभीर्य ओळखून त्यांनी तातडीने रत्नागिरी शहर पोलीस ठाण्यात धाव घेत तक्रार दाखल केली.
पालकांच्या तक्रारीवरून पोलिसांनी तत्परता दाखवत दोन्ही आरोपींविरुद्ध भारतीय न्याय संहिता (BNS) आणि बाल लैंगिक अत्याचार प्रतिबंधक कायदा (पोक्सो) अंतर्गत गुन्हा दाखल केला आहे. तसेच, सोशल मीडियावर व्हिडीओ व्हायरल केल्याप्रकरी माहिती तंत्रज्ञान (IT Act) कायद्यानुसारही कलमे लावण्यात आली आहेत.
पोलीस निरीक्षक विवेक पाटील यांनी या प्रकरणाचा तपास स्वतःच्या हाती घेतला आहे. दोन्ही आरोपींना अटक करण्यात आली असून, हा व्हिडीओ आणखी कोठे प्रसारित झाला आहे का? तसेच यामध्ये आणखी कोणाचा सहभाग आहे का? याचा तांत्रिक तपास पोलीस करत आहेत. अल्पवयीन मुलांवरील अशा अत्याचारांच्या वाढत्या घटनांमुळे पालकांमध्ये भीतीचे वातावरण असून, आरोपींना कठोर शिक्षा व्हावी अशी मागणी केली जात आहे.
