वैभववाडी : टेम्पो आणि दुचाकी यांच्यात झालेल्या अपघातात रत्नागिरी जिल्ह्यातील पोलीस कर्मचारी जागीच ठार झाला. कृष्णा मनोहर ठोंबरे (२५, रा. जरी बोडका, ता. खुलताबाद, जि. संभाजीनगर) असे मृताचे नाव आहे. तर महिला पोलीस कर्मचारी आरती अमर चौगुले (२१, रा. बिद्री कागल) ही गंभीर जखमी झाली आहे. ही घटना रविवारी सकाळी ७.३० वाजण्याच्या सुमारास तिरवडे तर्फे खारेपाटण या ठिकाणी घडली. याप्रकरणी टेम्पोचालक कादर उमर पाटणकर (४८, रा. कातळी, ता. गगनबावडा) याच्यावर वैभववाडी पोलीस ठाण्यात गुन्हा दाखल करण्यात आला आहे.
याबाबत अधिक वृत्त असे की, आरती चौगुले यांच्या बिद्री येथील घरी कार्यक्रम असल्याने दुचाकीवरून कृष्णा व आरती जात होते. राजापूर, खारेपाटण, भुईबावडा ते गगनबावडा या मार्गे ते प्रवास करीत होते. दरम्यान भुईबावडा परिसरात दाट धुके होते. त्याचवेळी गगनबावडाहून उंबर्डेच्या दिशेने भाजी भरलेला टेम्पो चालक कादर उमर पाटणकर घेऊन येत होता. तर पोलीस कृष्णा दुचाकी घेऊन गगनबावड्याच्या दिशेने जात होते. तिरवडे तर्फे खारेपाटणनजीक दाट धुक्यांत दोन्ही वाहनांचा अपघात झाला.
या अपघातात दुचाकीस्वार कृष्णा ठोंबरे रस्त्यावर आदळले. त्यांच्या डोक्याला मार लागल्याने ते जागीच गतप्राण झाले. या घटनेची माहिती मिळताच वैभववाडीचे सहाय्यक पोलीस निरीक्षक सुनील अवसरमोल, सहाय्यक पोलीस उपनिरीक्षक माधुरी अडुळकर घटनास्थळी दाखल झाले. पोलीस व स्थानिकांनी जखमी महिला पोलीस आरती चौगुले यांना उपचारासाठी वैभववाडी रुग्णालयात दाखल केले, तर मयत कृष्णा ठोंबरे यांचा मृतदेह पोलिसांनी शवविच्छेदनासाठी ग्रामीण रुग्णालयात दाखल केला. मयत पोलीस कृष्णा ठोंबरे हा तरुण २०२३ मध्ये रत्नागिरी पोलीस दलात भरती झाला होता. त्यांच्या अपघाती मृत्यूने पोलीस दलात हळहळ व्यक्त होत आहे.
