रायगड: निवडणुकांच्या पार्श्वभूमीवर (Black Magic) शांत असणाऱ्या (Raigad News) माथेरानमध्ये बुधवारी (19 नोव्हेंबर 2025) अमावास्येच्या रात्री घडलेल्या अघोरी विधीच्या प्रकाराने परिसरात खळबळ उडाली आहे. गुरुवारी सकाळी माथेरान स्मशानभूमीत अघोरी पूजा झाल्याचा धक्कादायक प्रकार उघडकीस आला. त्यानंतर शहरात भीतीचं सावट पसरलं. अंतिम संस्कारस्थळाच्या नियमित पाहणीसाठी गेलेल्या नगरपालिका कर्मचारी विजय चव्हाण यांना स्मशानभूमीच्या मध्यभागी लाल भोपळे, सुरी, त्यावर ठोकलेल्या अगरबत्त्या, मोठ्या मडक्या, कापलेल्या बकऱ्याची मुंडी, मास्यांचे तुकडे आणि ताजे रक्त जमिनीवर सांडलेले दिसले. याशिवाय स्मशानभूमीच्या कडेला खोदलेले दोन खोल खड्डेही संशयास्पद अवस्थेत आढळले. यानंतर चव्हाण यांनी तातडीने नगरपालिका आणि स्थानिक पोलिसांना याची माहिती दिली. पहाटेच्या सुमारास कोणीतरी तयारी करून रात्री हा अंधश्रद्धेचा विधी केला असावा, असा प्राथमिक अंदाज पोलिसांकडून व्यक्त करण्यात येत आहे. (Marathi Breaking News)
दरम्यान, निवडणुकीचं वातावरण तापलेलं असताना असा प्रकार समोर आल्यानंतर नागरिकांमध्ये भीती, संभ्रम आणि शंका वाढल्या आहेत. “निवडणुकीत दबावतंत्र म्हणून काळी जादू, अघोरी कृती किंवा मानसिक दबाव टाकण्याचा प्रयत्न तर नाही ना?” असा प्रश्न अनेक नागरिक विचारत आहेत. माथेरानमध्ये अशा प्रकारची घटना यापूर्वी कधीही न झाल्याचं सांगत काही ज्येष्ठ नागरिकांनी, “हे कृत्य जाणूनबुजून निवडणुकांच्या काळात वातावरण अस्थिर करण्यासाठी केलं असावं,” अशी प्रतिक्रिया दिली. प्रकाराची गंभीरता लक्षात घेऊन माणगाव व माथेरान पोलिसांनी तत्काळ घटनास्थळी धाव घेऊन पंचनामा सुरू केला आहे. परिसरात असलेल्या सीसीटीव्ही फुटेजची तपासणी सुरू असून, रात्री स्मशानभूमीत कोण गेले होते, याचा पोलिसांकडून शोध घेतला जात आहे. घटनास्थळी आढळलेल्या वस्तू व रक्ताचे नमुने फॉरेन्सिक प्रयोगशाळेत विश्लेषणासाठी पाठविण्यात आले आहेत. या प्रकरणाचा तपास सुरु असून पोलिसांनी नागरिकांना अफवांवर विश्वास न ठेवण्याचं आणि सहकार्य करण्याचं आवाहन केले आहे.
