अलिबाग : समुद्र किनाऱ्यावर अपघाताची एक चित्रफीती सध्या व्हायरल होत आहे. या अपघातात उंटासह तीन ते चार पर्यटक जखमी झाले आहेत. त्यामुळे या चित्रफीतीमुळे समुद्र किनाऱ्यांवर बेकायदेशीरपणे चालविण्यात येणाऱ्या एटीव्हीचा प्रश्न पुन्हा एकदा चर्चेत आला आहे.
ज्यात एका एटीव्हीवरचा चालकाचा ताबा सुटतो. त्यामुळे एटीव्ही बाईक आधी एका महिलेला धडक देते त्यात तिच्या हाताला धडक देऊन समोर उभ्या असलेल्या उंटाला जोरात जाऊन धडकते. या अपघातात एटीव्हीवर बसलेली महिला खाली पडते, आणि जखमी उंट घाबरून सैरा वैरा धावू लागतो. उंटावर बसण्याच्या प्रयत्नात असलेली एक महिला जोरात खाली पडते. एटीव्हीवर बसलेले एक चालक आणि त्याच्या सोबत बसलेला लहान मुलगाही या अपघातात किरकोळ जखमी होतो.
एटीव्हीचा अपघात होण्याची ही पहिली वेळ नाही. यापुर्वीही चालकांचे नियंत्रण सुटल्याने एटीव्ही अपघाताच्या घटना अलिबाग येथे घडल्या आहे. त्यामुळे समुद्र किनाऱ्यांवर बेकायदेशीरपणे चालविण्यात येणाऱ्या एटीव्ही वाहनांचा प्रश्न चर्चेत आला आहे.
एटीव्ही अर्थात ऑल टरेन बाईक या गाड्या खेळण्यांच्या प्रकारात मोडतात. त्यामुळे या गाड्यांना प्रादेशिक परिवहन कार्यालयाचे रजिस्ट्रेशन लागत नाही. या गाड्या समुद्र किनाऱ्यावर चालवण्यासाठी कुठल्याही विभागाची परवानगी घेण्याची गरज पडत नाही. त्यामुळे अनिर्बंध परिस्थितीत हा व्यवसाय किनारपट्टीवर गेल्या चार ते पाच वर्षांपासून फोफावत असल्याचे दिसून येत आहे.
