रायगड : रायगड जिल्ह्यातील महाड शहरातून एका विवाहित महिलेवर दीर्घकाळ छळ झाल्याची धक्कादायक घटना समोर आली आहे. पीडित महिलेच्या तक्रारीनुसार, लग्नानंतर गेली तब्बल 18 वर्षे तिचा शारीरिक, मानसिक आणि आर्थिक छळ करण्यात आला. एवढेच नाही तर तिच्या इच्छेविरुद्ध १० वेळा गर्भपात करण्यास भाग पाडल्याचा गंभीर आरोपही करण्यात आला आहे. या प्रकरणाची नोंद महाड शहर पोलीस ठाण्यात करण्यात आली असून, पोलिसांनी पुढील तपास सुरू केला आहे.
तक्रारीनुसार, विवाहानंतर सुरुवातीपासूनच महिलेवर माहेरहून पैसे आणि इतर वस्तू आणण्यासाठी दबाव टाकला जात होता. मागण्या पूर्ण न झाल्यास तिला वारंवार मारहाण, शिवीगाळ आणि अपमानास्पद वागणूक दिली जात होती. अनेक वर्षे ती हा त्रास सहन करत होती.
महिलेने दिलेल्या माहितीनुसार, ती गरोदर राहिल्यानंतर प्रत्येक वेळी तिच्या इच्छेविरुद्ध गर्भपात करण्यासाठी दबाव आणला जात असे. मानसिक भीती दाखवून तिला गर्भपाताच्या गोळ्या घेण्यास भाग पाडल्याचा आरोप करण्यात आला आहे. अशा प्रकारे एकूण 10 वेळा गर्भपात घडवून आणल्याचे तिने तक्रारीत नमूद केले आहे. या प्रकारामुळे तिच्या आरोग्यावर गंभीर परिणाम झाल्याचेही सांगण्यात आले आहे. सततच्या छळाला कंटाळून अखेर संबंधित महिलेने पोलीस ठाण्यात धाव घेत संपूर्ण घटना सांगितली. तिच्या तक्रारीवरून पोलिसांनी पतीविरुद्ध गंभीर कलमांनुसार गुन्हा दाखल करण्यात आला असून अधिक तपास सुरु आहे.
