मुंबई: राज्यातील वाहनधारकांसाठी एक चांगली बातमी आहे. परिवहन विभागाने 1 एप्रिल 2019 पूर्वी नोंदणी झालेल्या वाहनांवर HSRP (High Security Registration Plate) नंबरप्लेट बसवण्यासाठी मुदतवाढ दिली आहे. ही मुदतवाढ अनेक कारणांमुळे देण्यात आली आहे. HSRP बसवण्याच्या प्रक्रियेतील विलंब, केंद्रांवरील अपॉइंटमेंट मिळण्यास होणारा उशीर आणि नागरिकांच्या सततच्या मागण्या, या सर्व गोष्टी लक्षात घेऊन परिवहन विभागाने हा निर्णय घेतला आहे. या निर्णयामुळे लाखो वाहनधारकांना मोठा दिलासा मिळाला आहे. आता वाहनधारकांना 30 नोव्हेंबर 2025 पर्यंत ही प्लेट बसवता येईल. यापूर्वीची अंतिम मुदत 15 ऑगस्ट 2025 होती.
मुदत संपल्यावर कठोर कारवाईचा इशारा
“1 डिसेंबर 2025 पासून HSRP नसलेल्या वाहनांवर कठोर कारवाई केली जाईल. ज्या वाहन मालकांनी 30 नोव्हेंबर 2025 पर्यंत अपॉइंटमेंट बुक केली असेल, त्यांना कारवाईतून सूट मिळेल”राज्य परिवहन आयुक्त विवेक भिमनवार यांनी ही माहिती दिली आहे.
निर्बंध आणखी कडक
HSRP प्लेट्स नसलेल्या वाहनांसाठी सध्या मालकी हस्तांतरण आणि गहाणखत बदल यांसारख्या सेवा बंद आहेत. 1 डिसेंबर 2025 पासून पुनर्नोदणी आणि परवाना नूतनीकरण यांसारख्या सेवांवरही बंदी येणार आहे. त्यामुळे वाहनधारकांनी या मुदतीपूर्वी HSRP बसवणे बंधनकारक आहे. तपासणीमध्ये सापडलेली वाहने एचएसआरपी प्लेट बसवल्याशिवाय सोडली जाणार नाहीत, असाही इशारा देण्यात आला आहे.
