Agriculture News : मुंबई : महाडीबीटी शेतकरी योजना पोर्टल संदर्भात शेतकऱ्यांसाठी अत्यंत महत्त्वाची माहिती समोर आली आहे. काही दिवसांपूर्वी महाडीबीटी पोर्टलवर पूर्व संमती देण्याचा पर्याय बंद करण्यात आल्याची चर्चा होती. मात्र आता शासनाने याबाबत स्पष्ट माहिती दिली असून, ज्या शेतकऱ्यांनी आवश्यक कागदपत्रांची पूर्तता केली आहे, अशा शेतकऱ्यांचे अर्ज पूर्व संमती देऊन विचारात घेतले जाणार आहेत. यासाठी शेतकऱ्यांना 9 जानेवारीपर्यंतची अंतिम मुदत देण्यात आली आहे.
महाडीबीटी शेतकरी योजना पोर्टलद्वारे मागील सहा महिन्यांत सोडतीत निवड झालेल्या अनेक शेतकऱ्यांना कागदपत्रे अपलोड करण्यासाठी यापूर्वी मुदतवाढ देण्यात आली होती. तरीही अनेक शेतकऱ्यांनी अद्याप कागदपत्रे अपलोड केलेली नाहीत. त्यामुळे त्यांचे अर्ज शेतकरी स्तरावर प्रलंबित स्थितीत आहेत. ही बाब लक्षात घेऊन शासनाने शेतकऱ्यांना शेवटची संधी देण्याचा निर्णय घेतला आहे.
प्रशासनाने स्पष्ट केले आहे की, 9 जानेवारीनंतर कोणतीही मुदतवाढ दिली जाणार नाही. या तारखेपर्यंत आवश्यक कागदपत्रे महाडीबीटी पोर्टलवर अपलोड न केल्यास संबंधित अर्ज आपोआप रद्द करण्यात येणार आहेत. त्यामुळे अनुदानाचा लाभ घेण्यास इच्छुक शेतकऱ्यांनी वेळेत सर्व कागदपत्रे अपलोड करणे आवश्यक आहे. अन्यथा त्यांचे अर्ज कायमस्वरूपी रद्द होतील.
शासनाने असेही स्पष्ट केले आहे की, जे शेतकरी वेळेत कागदपत्रे अपलोड करून पूर्व संमती मिळवतील, त्यांचे अर्ज नंतर कोणत्याही कारणामुळे रद्द होणार नाहीत. त्यामुळे अंतिम तारखेची वाट न पाहता तातडीने प्रक्रिया पूर्ण करण्याचे आवाहन शेतकऱ्यांना करण्यात आले आहे.
अनुदान योजनांसाठी कागदपत्रांच्या बाबतीत काही सुलभता करण्यात आली आहे. निवड झालेल्या शेतकऱ्यांना सातबारा उतारा, आठ-अ उतारा, गाव-शिवाराचा पत्ता, आधार क्रमांक किंवा बँक खाते क्रमांक स्वतंत्रपणे सादर करण्याची आवश्यकता नाही. मात्र, यांत्रिकीकरणाशी संबंधित योजनांसाठी दरपत्रक देणे बंधनकारक आहे. तसेच फलोत्पादनाशी संबंधित योजनांसाठी प्राकलन सादर करणे आवश्यक आहे. आवश्यक कागदपत्रे न दिल्यास संगणकीय प्रणालीद्वारे सात दिवसांनंतर अर्ज आपोआप रद्द केले जाणार आहेत.
