हैदराबाद: टीम इंडियाचा स्टार फलंदाज संजू सॅमसनने धमाकेदार शतक झळकावत आपल्या स्फोटक फलंदाजीने बांगलादेशचा धुव्वा उडवला. हैदराबादमध्ये बांगलादेशविरुद्धच्या T20 मालिकेतील तिसऱ्या आणि शेवटच्या सामन्यात संजू सॅमसनने आपल्या T20 कारकिर्दीतील सर्वोत्तम खेळी खेळली आणि अवघ्या 40 चेंडूत शतक झळकावले. यासह त्याने आंतरराष्ट्रीय टी-20 मध्ये भारतासाठी दुसरे सर्वात जलद शतक झळकावले. या खेळीदरम्यान संजूने बांगलादेशचा फिरकीपटू रिशाद हुसेनला सर्वाधिक धुतले आणि एकाच षटकात सलग 5 षटकार ठोकले.
हैदराबादमध्ये झालेल्या मालिकेतील शेवटच्या टी-20 सामन्यात टीम इंडिया प्रथम फलंदाजीला आली आणि त्याचा पुरेपूर फायदा संजू सॅमसनने घेतला. मालिकेतील पहिल्या आणि दुसऱ्या सामन्यात मोठी खेळी करण्यात अपयशी ठरलेल्या संजूने तिसऱ्या सामन्यात मोठी धावसंख्या उभारली. त्याने असे षटकार आणि चौकार मारले, ज्यामुळे राजीव गांधी स्टेडियममध्ये बसलेले प्रेक्षक अचंबित झाले.
सलग 5 षटकार ठोकले, पहिले शतक झळकावले
सॅमसनने डावाच्या दुसऱ्याच षटकात तस्किन अहमदविरुद्ध सलग 4 चौकार मारले होते. त्यानंतर सातव्या षटकात रिशाद हुसेनला 3 चेंडूत 2 चौकार आणि 1 षटकार खेचून आपले अर्धशतक पूर्ण केले. त्याने हे अर्धशतक अवघ्या 22 चेंडूंमध्ये पूर्ण केले, जे बांगलादेशविरुद्ध भारताकडून या फॉरमॅटमधील सर्वात वेगवान अर्धशतक आहे. यानंतर संजू आणखीनच आक्रमक बनला आणि रिशाद हुसेन पुन्हा त्याचे लक्ष्य बनला. 10व्या षटकात रिशादचा पहिला चेंडू हुकल्यानंतर संजूने सलग 5 चेंडूत 5 षटकार मारून खळबळ उडवून दिली. त्यानंतर संजूने आपल्या T20 आंतरराष्ट्रीय कारकिर्दीतील पहिले शतक अवघ्या 40 चेंडूत पूर्ण केले.
शतकासह अनेक विक्रम
यासह संजूने आंतरराष्ट्रीय टी-20 मध्ये भारतासाठी दुसरे सर्वात जलद शतक झळकावले. सर्वात वेगवान शतकाचा विक्रम माजी कर्णधार रोहित शर्माच्या नावावर आहे, ज्याने 35 चेंडूत ही कामगिरी केली. आता संजू आपला सध्याचा कर्णधार सूर्यकुमार यादवला (45 चेंडू) मागे टाकत दुसऱ्या स्थानावर पोहोचला आहे. एवढेच नाही तर बांगलादेशविरुद्ध टी-20 आंतरराष्ट्रीय शतक झळकावणारा संजू हा पहिला भारतीय फलंदाज बनला आहे. संजू शेवटी 46 चेंडूत 111 धावांची शानदार खेळी खेळून बाद झाला, ज्यात त्याने 11 चौकार आणि 8 षटकार मारले. यादरम्यान संजूने कर्णधार सूर्यासोबत दुसऱ्या विकेटसाठी अवघ्या 70 चेंडूत 173 धावांची भागीदारी केली.
