CSK VS RR : आयपीएलच्या यंदाच्या हंगामात चेन्नई सुपर किंग्स ची सुरुवात अपेक्षेप्रमाणे झाली नाही. मागील मोसमात शेवटच्या क्रमांकावर राहिल्यानंतर यंदा संघाकडून जोरदार पुनरागमनाची अपेक्षा होती, मात्र राजस्थान रॉयल्स विरुद्धच्या सामन्यात सीएसकेला 127 धावांवर ऑलआऊट होत मोठा पराभव पत्करावा लागला. 20 ओव्हर पूर्ण करण्याआधीच 19.4 ओव्हरमध्ये संघाचा डाव संपला, हे त्यांच्या फलंदाजीतील कमकुवतपणाचं स्पष्ट चित्र आहे.
सुरुवातीपासूनच राजस्थानच्या गोलंदाजांनी सीएसकेवर दबाव टाकला. जोफ्रा आर्चर आणि नांद्रे बर्गरयांनी पॉवरप्लेमध्येच 4 विकेट घेत चेन्नईला अडचणीत टाकलं. मधल्या फळीत कोणीही मोठी भागीदारी करू शकला नाही. जेमी ओव्हरटन याने 43 धावांची झुंजार खेळी करत संघाला 100 पार नेलं, पण ते पुरेसं ठरलं नाही.
127 धावांचं लक्ष्य राजस्थान रॉयल्स ने केवळ काही षटकांत सहज पार केलं. वैभव सूर्यवंशी याने 17 चेंडूत 52 धावांची तुफानी खेळी करत सामना एकतर्फी केला. त्याचा स्ट्राईक रेट 305.88 इतका होता, ज्यामुळे सीएसकेचा आत्मविश्वास पूर्णपणे खचला. यशस्वी जैस्वाल आणि रियान परागनी शेवटपर्यंत नाबाद राहून विजयावर शिक्कामोर्तब केलं.
या विजयामुळे राजस्थानचा नेट रनरेट +4.171 झाला असून ते गुणतालिकेत 1 क्रमांकावर पोहोचले आहेत. दुसरीकडे, चेन्नईसमोर मोठं आव्हान उभं राहिलं आहे. सलग अपयशामुळे संघ व्यवस्थापनावर दबाव वाढत आहे.
या पराभवाचं महत्त्व इतकंच नाही की एक सामना हरला, तर तो संघाच्या एकूण रणनीतीवर प्रश्नचिन्ह निर्माण करतो. फलंदाजीतील अस्थिरता, सुरुवातीच्या विकेट्स आणि मधल्या फळीतल्या अपयशामुळे सीएसकेला पुढील सामन्यांमध्ये मोठे बदल करावे लागणार आहेत. IPL सारख्या स्पर्धेत सुरुवातीचे 2-3 सामने गमावल्यास प्लेऑफची शर्यत कठीण होते. आणि सध्या चेन्नई त्याच वळणावर उभी आहे.
