लोणी काळभोर : नवरात्रीच्या उत्सवादरम्यान आयोजित करण्यात आलेल्या हास्य कार्यक्रमात “तु माझ्या सोबत एक रात्र झोप” असे म्हणून एका प्रसिद्ध ‘रिल्सस्टार’ कडे शरीर सुखाची मागणी केल्याची धक्कादायक (Pune Crime) घटना घडली आहे. पीडिता या ‘रीलस्टार’ असून पुणे जिल्ह्यातील एका गावात कुटुंबासोबत राहतात. याप्रकरणी लोणी काळभोर पोलीस ठाण्यात एकाच्या विरोधात विनयभंगाचा गुन्हा दाखल करण्यात आला आहे.
कानिफनाथ सुदाम जगदाळे (वय 39, रा. माळी मळा, लोणी काळभोर ता. हवेली जि. पुणे) असे गुन्हा दाखल करण्यात आलेल्याचे नाव आहे. या प्रकरणी एका 37 वर्षीय रिल्सस्टारने लोणी काळभोर पोलीस ठाण्यात फिर्याद दिली आहे.
हेही वाचा: “सगळे नवरात्र कार्यक्रमात अडकलेत, आपण फिरायला जाऊ” म्हणत महिलेचा विनयभंग; एकावर गुन्हा दाखल
पोलिसांनी दिलेल्या माहितीनुसार, पीडिता या प्रसिद्ध ‘रीलस्टार’ असून आपल्या कुटुंबासोबत राहतात. पीडिता या पती व मुलांसोबत माळी मळा येथील नवरात्री उत्सवानिमित्त आयोजित करण्यात आलेल्या एका फनि गेमचा कार्यक्रमासाठी आल्या होत्या. फनि गेमचा कार्यक्रम पाहत असताना, आरोपी कानिफनाथ जगदाळे हा तेथे आला. फिर्यादी यांना काम आहे म्हणून त्याने एका बाजूला बोलाविले. आणि म्हणाला, “माझं तुझ्यावर प्रेम आहे, तु मला आवडती, तु माझ्या सोबत एक रात्र झोप” असे म्हणून पीडिता यांच्या स्त्री मनास लज्जा उत्पन्न होईल. असे गैरवर्तन केले.
दरम्यान, पीडिता यांचे पती याचा जाब विचारण्यासाठी कानिफनाथ जगदाळे याच्याकडे गेले असता, जगदाळे म्हणाला, ‘मी तुझ्या पत्नीला बोललो आहे तुला काय करायचे आहे ते कर, तु जास्त बोलला तर तुझे हातपाय काढून टाकीन अशी धमकी दिली.
याप्रकरणी पीडित ‘रीलस्टार’ने लोणी काळभोर पोलीस ठाण्यात फिर्याद दिली असून, त्यानुसार कानिफनाथ जगदाळे याच्यावर भारतीय न्याय संहिता 2023 चे कलम 74, 351 (2), (3) प्रमाणे गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलिस उपनिरीक्षक पूजा माळी करीत आहेत.
