Yawat : पुणे-सोलापूर महामार्गावर अज्ञात वाहनाच्या धडकेत 28 वर्षीय तरुणाचा जागीच मृत्यू झाल्याची दुर्दैवी घटना घडली. भांडगाव (ता. दौंड) हद्दीतील सोनाक्षी मंगल कार्यालयजवळ गुरुवारी (ता. 05) रात्री दहा वाजता घडली. या प्रकरणी यवत पोलीस ठाण्यात अज्ञात वाहनचालकाविरुद्ध गुन्हा दाखल करण्यात आला आहे.
विपीनकुमार श्रीजयकुमार चैरासिया (वय-28, रा. रा. हरपळेवस्ती, भांडगाव ता. दौंड, मुळ गाव वार्ड क्र.2, तालबन्ना, दुर्गा मंदीरचे जवळ, पोस्ट साहेबगंज, जि. साहेबगंज राज्य झारखंड) असे अपघातात मृत्यू झालेल्या तरुणाचे नाव आहे. याप्रकरणी त्यांचे बंधु दीपककुमार श्रीजयकुमार चैरासिया यांनी यवत पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी दीपककुमार चैरासिया यांचा भाऊ विपीनकुमार चैरासिया हा सुमारे दहा दिवसांपूर्वी झारखंड येथून कामानिमित्त भांडगाव येथे आला होता. तो येथील टेस्टीबाईट कंपनीत काम करत होता व सोनाक्षी मंगल कार्यालयाजवळ भाड्याच्या खोलीत राहत होता.
गुरुवारी (ता. 05) रात्री साडे दहा वाजता वाजण्याच्या सुमारास जेवण करून विपीनकुमार खोलीवर झोपण्यासाठी घरातून बाहेर पडला. काही वेळानंतर पुणे-सोलापूर महामार्गावर हरपळेवस्ती येथील बर्फ फॅक्टरीसमोर लोकांची गर्दी दिसल्याने दीपककुमार यांनी घटनास्थळी जाऊन पाहिले असता अज्ञात वाहनाने एका तरुणाला जोरदार धडक दिल्याचे दिसून आले.
सदर घटनेची माहिती मिळताच श्री दत्त ॲम्बुलन्स चालक समीर अन्सारी घटनास्थळी दाखल झाले. यावेळी पुढील उपचारासाठी घेऊन जाताना अॅम्बुलन्समध्ये पाहिले असता जखमी अवस्थेत असलेला तरुण हा त्यांचा भाऊ विपीनकुमार असल्याचे दिसून आले. त्याच्या डोक्याला, हाताला व पायाला गंभीर दुखापत झाली होती. त्यानंतर त्याला तातडीने यवत येथील ग्रामीण रुग्णालयात उपचारासाठी नेण्यात आले; मात्र डॉक्टरांनी तपासणी करून तो उपचारापूर्वीच मृत झाल्याचे घोषित केले. या प्रकरणी यवत पोलीस ठाण्यात अज्ञात वाहनचालकाविरुद्ध गुन्हा दाखल करण्यात आला आहे.
दरम्यान, या प्रकरणी पुणे-सोलापूर महामार्गावर भरधाव वेगाने व निष्काळजीपणे वाहन चालवून अपघात घडवून तरुणाच्या मृत्यूस कारणीभूत ठरल्याप्रकरणी अज्ञात वाहनचालकाविरुद्ध गुन्हा दाखल करण्यात आला आहे. पुढील तपास यवत पोलीस करीत आहेत.
