पुणे: सहकारनगर पोलिसांनी महेश मोहन रासकर आणि किरण भाऊसाहेब ढगे या दोन्ही सराईत गुन्हेगारांना एका महिलेचे अपहरण करून तिचा विनयभंग केल्याच्या आरोपाखाली अटक केली. ही घटना ६ एप्रिल रोजी सायंकाळी ५:३० वाजता घडली, जेव्हा पीडिता वाघोलीहून पुण्यातील वडगाव धायरी येथील तिच्या घरी आली. आरोपीने चारचाकी गाडीतून पिडीतेचा पाठलाग केला, सोसायटीच्या गेटवर तिला अडवले आणि जबरदस्तीने तिचे अपहरण करत चारचाकीत बसवले. आरोपीने पीडितेचा विनयभंग करत अश्लील कृत केल्याची धक्कादायक माहिती उघडकीस आली आहे. पिडीतेला जीवे मारण्याची धमकी देत तिच्या मोबाईल फोनचा पासवर्ड विचारून UPI खात्यातून ₹१,४०० एका दुकानदाराच्या खात्यात ट्रान्सफर केले आणि दुकानदाराकडून कॅश पैसे घेतले. या प्रकरणी पीडितेने सहकारनगर पोलिसांकडे तक्रार दाखल केली.
वरिष्ठ पोलीस निरीक्षक राहुल गौड यांच्या नेतृत्वाखाली तपास करण्यात आला, सहाय्यक निरीक्षक सागर पाटील आणि इतर पोलीस कर्मचाऱ्यांच्या मदतीने आरोपींना ताब्यात घेऊन चौकशी करण्यात आली, चौकशी दरम्यान त्यांनी गुन्ह्याची कबुली दिली. पोलिसांनी आरोपींकडून १,४०० रुपये आणि ४ लाख रुपये किमतीची चारचाकी गाडी जप्त केली.
