पुणे: पुणे- नगर रस्ता येथील एक दुर्दैवी घटना समोर आली आहे. आज वडगाव शेरी चौकाजवळ टँकर पलटी झाला होता. या अपघातात टँकरमधून मोठ्या प्रमाणात वायुगळती झाल्यामुळे काही काळ वाहतूक ठप्प झाली होती. मात्र, ही वाहतुक कोंडी ६२ वर्षीय महिलेच्या जीवावर बेतली आहे. आपल्या कुटुंबीयांसोबत उपचारासाठी जाताना या वाहतूक कोंडीतून वाट न मिळाल्याने सदर महिलेला कोणत्याही प्रकारची वैद्यकीय मदत मिळू शकली नाही. त्यामुळे, कारमध्ये गुदमरून महिलेचा मृत्यू झाला आहे. (Nagar Road Traffic Jam)
पुणे-अहमदनगर महामार्गावर मध्यरात्री टँकर पलटी झाल्याने अपघात झाला होता. यामध्ये मोठ्या प्रमाणात वायुगळती झाली. घटनेची माहिती मिळताच अग्निशमन दलाकडून वायुगळती थांबविण्याचे काम हाती घेण्यात आले. रिलायन्स पेट्रोकेमिकल्स कंपनीची मदत येईपर्यंत संभाव्य धोका लक्षात घेऊन टँकरवर पाण्याचे स्प्रे मारले. तर पोलिस विभागाकडून नगर रस्त्यावरील वाहतूक नियंत्रित करण्यात येत होती.
परंतु, रस्त्याच्या बरोबर मध्यभागी टँकर पलटी होऊन रस्त्यावर ज्वलनशील पदार्थ सांडल्याने काही काळ वाहतूक पूर्णपणे ठप्प झाली. त्यानंतर पर्यायी मार्गाने वाहतूक वळवण्यात येत होती. मात्र, सकाळी कार्यालययीन कामकाजाची वेळ असल्याने नगर मार्गावर मोठ्या प्रमाणात वाहतूक कोंडी झाली. या दरम्यान एक ६२ वर्षीय आजारी महिला उपचारासाठी कुटुंबीयांसोबत कारमधून हॉस्पिटलमध्ये जात होती. पण, वाहतूक कोंडीमुळे त्यांच्या कारला रस्ता मिळाला नाही. त्यामुळे, या महिलेला वेळेवर कोणत्याही प्रकारची वैद्यकीय मदत मिळू शकली नाही. त्यामुळे कारमध्येच त्यांचा गुदमरून मृत्यू झाला आहे. या महिलेला जायला वाट मिळाली असती, वेळेत उपचार मिळून कदाचित महिलेचा जीव वाचला असता. मात्र, दुर्दैवाने त्यांचा मृत्यू झाल्याने परिसरात हळहळ व्यक्त करण्यात येत आहे.
