पुणे : चोराला पोलीस चोरीची शिक्षा देत असतात. चोरीचे गांभीर्य लक्षात घेऊन शिक्षा सुनावली जाते. मात्र, पुण्यात नुकताच एक धक्कादायक प्रकार उघडकीस आला आहे. एका महिलेने अंडे चोरले असा आरोप करत, अंग झडती घ्यावी लागेल, म्हणत संबंधित महिलेला शिक्षा म्हणून चक्क अंगावरील कपडे उतरण्यास भाग पाडले.
एवढेच नव्हे तर महिलेवर अश्लील शेरेबाजी करत विनयभंग केल्याचा प्रकार शहरातील हॉटेल पार्क ऑर्नेटच्या कुकने केल्याचे तपासात निष्पन्न झाले आहे. हॉटेल प्रशासनाने संबंधित कर्मचाऱ्यावर कठोर कारवाई करावी, अशी मागणी होत आहे. या प्रकरणी आरोपीवर गुन्हा दाखल करण्यात आला आहे.
याबाबत मिळालेल्या अधिक माहितीनुसार, मुकेश सिंह पुंडील असे आरोपीचे नाव आहे. त्याच्यावर विनयभंग केल्याचा गुन्हा दाखल करण्यात आला आहे. शिक्षणाचे माहेरघर असलेल्या पुण्यात अशा प्रकारचे अश्लील कृत्य करण्यास धजावणाऱ्या कर्मचाऱ्याला कडक कायदेशीर शिक्षा झालीच पाहिजे, अशी मागणी होत आहे.
याप्रकरणी पोलिसांनी दिलेल्या माहितीनुसार, पुण्यातील हॉटेल पार्क ऑर्नेटमध्ये आरोपी मुकेश सिंह पुंडील हा शेफ म्हणून काम करत आहे. पिडीत ५० वर्षीय महिला या हॉटेलमध्ये कामाला आहे. दरम्यान, मुकेश सिंह याने कामगार महिलेवर अंडे चोरल्याचा आरोप केला. लपवून ठेवलेले अंडे शोधण्यासाठी तुझी अंगझडती घ्यावी लागेल, असे म्हटले. एवढ्यावरच न थांबता त्याने महिलेला कपडे उतरण्यास भाग पाडले. महिलेचा रस्ता अडवून तिचा विनयभंग केला.
दरम्यान, हॉटेल पार्क ऑर्नेटच्या शेफच्या या कृत्यानंतर संताप व्यक्त होत आहे. पुण्यासारख्या सुसंस्कृत शहरात झालेल्या या प्रकाराबद्दल संतप्त प्रतिक्रिया व्यक्त होत आहे. या प्रकरणी आरोपीवर गुन्हा दाखल करण्यात आला आहे. येरवडा पोलीस या घटनेचा अधिक तपास करत आहेत.
