पुणे : पुण्यात वाहनचालकांसाठी दिलासादायक बातमी आहे. हेल्मेट न घालणे, सीटबेल्ट न लावणे, सिग्नल तोडणे, वाहन चालवताना मोबाईल वापरणे, चुकीचे पार्किंग यांसारखे फाईन तुमच्या गाडीवर असतील तर तुम्ही ते आता कमी करून घेऊ शकता. पुणे जिल्हा विधी सेवा प्राधिकरण आणि पुणे शहर वाहतूक पोलिस यांच्या संयुक्त विद्यमाने 10 ते 13 सप्टेंबर 2025 दरम्यान राष्ट्रीय लोकअदालतीचे आयोजन करण्यात आले आहे.
ही लोकअदालत येरवडा पोस्ट ऑफिसजवळील वाहतूक शाखेच्या कार्यालयात सकाळी 10 ते सायंकाळी 5 वाजेपर्यंत होणार आहे. याठिकाणी जाऊन तुम्ही तुमच्या गाडीवरचा फाईन कमी करून घेऊ शकता आणि भरू शकता.
कोणत्या वाहतूक नियमभंगांवर सवलत मिळेल?
विनाहेल्मेट दुचाकी चालवणे, सीटबेल्ट न लावणे, सिग्नल तोडणे, वेगमर्यादा ओलांडणे, चुकीचे पार्किंग, वाहन चालवताना मोबाइल वापर, विनापरवाना किंवा विना पीयूसी वाहन चालवणे, फिटनेस प्रमाणपत्र नसणे, चुकीच्या लेनमध्ये वाहन चालवणे, नंबरप्लेट नसणे. या नियमभंगावर तुम्हाला सवलत मिळेल.
कोणत्या वाहतूक नियमभंगांवर सवलत मिळणार नाही?
मद्यपान करून वाहन चालवणे, अपघात करून पळून जाणे, बेपर्वाईने वाहन चालवून प्राणघातक अपघात घडवणे, अल्पवयीन व्यक्तीने वाहन चालवणे, अनधिकृत शर्यती आयोजित करणे किंवा त्यात सहभागी होणे, गुन्ह्यासाठी वाहनाचा वापर, न्यायालयात प्रलंबित असलेली प्रकरणे, इतर राज्यांतील वाहतूक नियमभंगांची चलने कमी होणार नाहीत.
दरम्यान, पुणे वाहतूक पोलिसांनी नागरिकांना या लोकअदालतीत सहभागी होऊन या सवलतीचा लाभ घेऊन गाडीवरचे फाईन कमी करून गाडीवरील थकबाकी भरण्याचे आवाहन केले आहे.
