पुणे: शहराच्या मध्यवर्ती भागातील गुरुवार पेठेत दोन ठिकाणी घरफोडीच्या घटना घडल्याने खळबळ उडाली आहे. चोरट्यांनी बंद सदनिकांचे कुलूप तोडून एकूण ११ लाख ५१ हजार रुपयांचा ऐवज चोरून नेला. या प्रकरणी खडक पोलीस ठाण्यात गुन्हा दाखल करण्यात आला असून, सहायक पोलीस निरीक्षक अर्जुन कुदळे याप्रकरणाचा तपास करत आहेत.

या प्रकरणी बिबवेवाडी परिसरात राहणाऱ्या एका व्यक्तीने खडक पोलिसांत फिर्याद दिली आहे. त्यांची सदनिका गुरुवार पेठेतील रोशनी हाऊसिंग सोसायटीत आहे. काही दिवसांपासून ती सदनिका बंद होती. ही संधी साधून चोरट्यांनी सदनिकेचे कुलूप तोडले आणि ऐवज चोरून नेला. याच सोसायटीतील दुसऱ्या एका महिलेच्या सदनिकेचे देखील कुलूप तोडून चोरट्यांनी चोरी केली. दोन्ही घरांमधून मिळून सुमारे ११ लाख ५१ हजार रुपयांचा ऐवज चोरून नेण्यात आल्याचे प्राथमिक तपासातून समोर आले आहे.
गुरुवार पेठ हा गर्दीचा आणि वस्तीने भरलेला परिसर असूनही एकाच सोसायटीतील दोन सदनिका फोडून चोरट्यांनी इतक्या मोठ्या प्रमाणात चोरी केली, ही बाब गंभीर असून परिसरातील नागरिकांमध्ये भीतीचं वातावरण निर्माण झालं आहे. काही दिवसांपूर्वीच सदाशिव पेठेतील बॅरिस्टर गाडगीळ स्ट्रीट परिसरात चोरट्यांनी एका सदनिकेचे कुलूप तोडून १३ लाख रुपयांचे दागिने चोरल्याची घटना घडली होती. त्यामुळे पुणे शहरात घरफोडींच्या घटनांमध्ये वाढ होत असल्याचे दिसून येत आहे.

खडक पोलीस ठाण्याचे अधिकारी आणि गुन्हे अन्वेषण पथक घटनेचा तपास सुरू असून, परिसरातील सीसीटीव्ही फुटेज तपासण्यात येत आहेत. चोरट्यांनी कोणती साधने वापरली, चोरी कशी केली, याचा शोध घेण्यासाठी तपास वेगाने सुरू आहे.







