पुणे: विमाननगर नागरिक मंचाने पुणे महापालिकेच्या तीन दशकांहून अधिक काळाच्या निष्क्रियतेवर आणि दुर्लक्षावर तीव्र नाराजी व्यक्त केली आहे. विशेषतः व्हीआयपी एअरपोर्ट रोडच्या रुंदीकरणासंदर्भात पुणे महानगरपालिका काहीच पाऊलं उचलत नसल्याची तीव्र टीका झाली आहे. या रस्त्याची रुंदी अत्यंत अपुरी असून सतत वाहतूक कोंडीचा प्रश्न निर्माण होत आहे.
माहिती अधिकार कायद्याच्या अंतर्गत मिळालेल्या कागदपत्रांनुसार, १९८७च्या विकास आराखड्यानुसार व्हीआयपी एअरपोर्ट रोड ३० मीटर रुंद असावा, असं नमूद आहे. मात्र प्रत्यक्षात आजही अनेक ठिकाणी या रस्त्याची रुंदी फक्त १८.३ मीटर इतकीच आहे. “जमीन संपादनासाठी पुणे महानगरपालिकेकडे तीन दशके होती, आणि आता निधी नसल्याचा मुद्दा ग्राह्य धरता येणार नाही,” असे मंचाच्या समन्वयक कनीज सुखरानी यांनी सांगितले.
नागरिकांनी पुणे महानगरपालिकेकडे खाजगी बिल्डर व सोसायट्यांकडून मागील जागा रोख भरपाई किंवा TDR च्या माध्यमातून ताब्यात घेण्याची मागणी केली आहे. सहकार्य न केल्यास जिल्हाधिकाऱ्यांमार्फत सक्तीने जमिनी हस्तांतरित करण्याची मागणीही पुढे आली आहे. सदर रस्त्यावर १९ अनधिकृत वर्कशॉप्स चालू असून, त्यातील वाहने सर्रास रस्त्यावरच ये-जा करतात. यामुळे वाहतूक कोंडी वाढते. टर्मिनल २ उघडल्यानंतर विमाननगर परिसरातील वाहतूक अजूनच बिघडली आहे. दररोज सुमारे ३०० उड्डाणांमुळे रस्ता अपुरा पडत आहे.
पुणे महानगरपालिकेने काही अतिक्रमकांना नोटीस दिल्या आहेत, मात्र पुढील कारवाई अद्याप झालेली नाही. “नवीन इमारतींना परवानगी देताना पुणे महानगरपालिकेने ‘सेटबॅक’ का घेतले नाही?” असा सवाल मंचाने केला आहे.नागरिकांनी वाहतूक पोलिसांकडून अनधिकृत पार्किंग, रस्त्यावरच दुरुस्ती, आणि चुकीच्या दिशेने चालणाऱ्या वाहनांवर कठोर कारवाई करण्याची मागणी केली आहे.
