लोणी काळभोर : मागील 15 दिवसांपूर्वी कदमवाकवस्ती (ता. हवेली) ग्रामपंचायत हद्दीतील गुजर वस्ती परिसरातील एक दुचाकी चोरट्यांनी चोरून नेल्याची घटना घडली होती. ही घटना ताजी असतानाच, आता कुंजीरवाडी (ता. हवेली) ग्रामपंचायत हद्दीतील धुमाळमळा परिसरात घरासमोर लावलेली दुचाकी अज्ञात चोरट्याने भरदिवसा चोरून नेल्याची घटना शुक्रवारी (ता.15) दुपारी दोन वाजण्याच्या सुमारास घडली आहे. ही घटना सीसीटीव्ही कॅमेरात कैद झाली आहे.
याप्रकरणी ज्ञानेश्वर बबन धुमाळ (रा. धुमाळमळा, कुंजीरवाडी, ता. हवेली) यांनी लोणी काळभोर पोलीस ठाण्यात फिर्याद दिली आहे. त्यानुसार अज्ञात चोरट्याच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, ज्ञानेश्वर धुमाळ हे एक नर्सरी व्यावसायिक आहेत. धुमाळ हे कुंजीरवाडी ग्रामपंचायत हद्दीतील धुमाळमळा परिसरात कुटुंबासोबत राहतात. धुमाळ हे शुक्रवारी दुपारच्या सुमारास घरात आराम करत होते. धुमाळ यांचा मुलगा शंतनू याने दुपारी बारा वाजण्याच्या सुमारास घरासमोर दुचाकी लॉक करुन पार्क केली होती.
त्यानंतर शुक्रवारी दुपारी साडेतीन वाजण्याच्या सुमारास शंतुनू घरासमोर गाडी पार्क केलेल्या ठिकाणी गेला. तेव्हा त्याला त्या ठिकाणी गाडी मिळून आली नाही. गाडीचा आजुबाजुला शोध घेतला. मात्र गाडी सापडली नाही. त्यानंतर सीसीटीव्ही कॅमेरे तपासले असता, एक इसम दुचाकी चोरून घेऊन जाताना दिसून आला.
याप्रकरणी ज्ञानेश्वर धुमाळ यांनी लोणी काळभोर पोलीसात तक्रार दिली आहे. त्यानुसार अज्ञात चोरट्याच्या विरोधात दुचाकी चोरीचा गुन्हा दाखल करण्यात आला आहे. पुढील तपास लोणी काळभोर पोलीस करीत आहेत.
