पुणे: आगामी लोकसभा निवडणुकीत राष्ट्रवादीचा अजित पवार गट बारामती, शिरूर, सातारा, रायगड या चार जागा लढवणार आहे. उपमुख्यमंत्री अजित पवार यांनी शुक्रवारी कर्जत येथे आयोजित करण्यात आलेल्या शिबिरात ही घोषणा केली. बारामती, शिरूर, सातारा आणि रायगड या लोकसभेच्या जागा लढणार असल्याचं अजित पवारांनी सांगितलं. यावरून खासदार सुप्रिया सुळे यांनी प्रतिक्रिया व्यक्त केली आहे.
‘एबीपी माझा’शी संवाद साधताना खासदार सुप्रिया सुळेंनी म्हटलं, “मी लोकशाहीवर विश्वास ठेवणारी भारताची नागरिक आहे. त्यामुळे कुठल्याही पक्षाला कुठेही निवडणूक लढण्याचा अधिकार आहे. कोण कुठून लढणार हा महायुतीचा अंतर्गत प्रश्न आहे. मी मनापासून याचं स्वागत करते, कारण ही लोकशाही आहे.” असं देखील सुळे म्हणाल्या.
“आमची नाती एका जागेवर आहेत आणि राजकारण हे वेगळं आहे. आपल्या प्रोफेशन आणि नात्यात कधीच गल्लत करायची नसते. मी लोकप्रतिनिधी म्हणून समाजसेवा केली आहे. लोकशाहीमध्ये कुणीतरी माझ्याविरोधात लढणारच आहे. यामध्ये काहीही गैर नाही. उलट माझ्याविरोधात कुणीतरी लढलच पाहिजे, हा माझा कायम आग्रह राहिला आहे. बाकी महाराष्ट्र आणि बारामतीतील मायबाप जनता ठरवेल,” असं खासदार सुप्रिया सुळे म्हणाल्या.
तुमच्याच कुटुंबातील व्यक्तीच लोकसभा निवडणुकीला तुमच्याविरोधात उभे राहिलं तर काय करणार? या प्रश्नावर सुप्रिया सुळेंनी सांगितलं, “मी लोकप्रतिनिधी आहे. मी लोकांची सेवा करण्यासाठी राजकारणात आली आहे. ही काही लढाई नाही आहे. दोन वेगळे विचार आहेत. लोकसेवा आपला विचार असेल, तर लढाई वगैरे काही नसतं.” असं सुळेंनी म्हटलं आहे.
