शिरूर: शिरूर-पारनेर-श्रीगोंदा तालुक्यांमधील शेतकरी बांधवांनी शेतकरी कृती समितीच्या नेतृत्वाखाली मागील दीड महिन्यांपासून मोठ्या संयमाने लढा दिला. या लढ्याला अखेर यश मिळाले असून, शिरूर येथील जुन्या आणि नव्या बाजार समिती आवारात ४ जून पासून शेतकरी बाजार सकाळी आणि संध्याकाळी अशा दोन्ही वेळेमध्ये भरविण्यात येणार आहे.
शिरूर कृषी उत्पन्न बाजार समितीने यासंदर्भात अधिकृत पत्रक जाहीर केले असून, शेतकऱ्यांच्या सोयीसाठी भाजीपाला व तरकारी बाजार आता दोन वेळा म्हणजे पहाटे सव्वा चार ते सकाळी सव्वा आठ आणि संध्याकाळी सहा ते रात्री आठ या वेळेत भरविण्यात येणार आहे.
सकाळचा बाजार छत्रपती शिवाजी महाराज मुख्य मार्केट यार्डमध्ये तर संध्याकाळचा बाजार नवीन मार्केट यार्डमधील जुन्या वजनकाट्याशेजारी भरवण्यात येईल, अशी माहिती बाजार समिती प्रशासनाकडून देण्यात आली आहे.
दरम्यान, १३ एप्रिल पासून शेतकरी बाजार पहाटेच्या वेळेत सुरू करण्यात आला होता. मात्र,काही शेतकऱ्यांनी संध्याकाळी बाजार भरवण्याची मागणी केली होती, तर काहींनी पहाटेचा वेळ कायम ठेवण्याचे मत मांडले होते. त्यानुसार,शिरूर बाजार समिती प्रशासन यांनी २२ मे रोजी शेतकरी प्रतिनिधींसोबत झालेल्या चर्चेनंतर दोन्ही वेळांमध्ये बाजार भरविण्याचा निर्णय घेण्यात येईल असे सांगितले होते.
शिरूर-पारनेर-श्रीगोंदा तालुक्यामधील शेतकऱ्यांनी शेतकरी कृती समितीच्या मागे ठामपणे उभे राहून, संयमाने लढा दिला. त्यामुळेच बाजार समिती प्रशासनाला शेतकऱ्यांच्या मागणीनुसार सकारात्मक निर्णय घेण्यास भाग पाडता आले. त्यामुळे शेतकऱ्यांच्या लढ्याला यश मिळाले आहे. असे शेतकरी कृती समितीचे नाथाभाऊ पाचर्णे यांनी सांगितले.
