Wagholi News: पुणे : घरात कोणी नसताना अकरावीत शिकणाऱ्या वाघोलीतील विद्यार्थ्याने गळफास घेऊन आत्महत्या केल्याची धक्कादायक घटना नुकतीच उघडकीस आली आहे. आत्महत्येमागचे नेमके कारण अद्याप समजू शकले नाही.
याबाबत मिळालेल्या अधिक माहितीनुसार, अजय विश्वनाथ पवळे (वय १६, रा. अनुसया पार्क, वाघोली) असे आत्महत्या केलेल्या विद्यार्थ्यांचे नाव आहे. याप्रकरणी लोणीकंद पोलीस ठाण्यात अकस्मात मृत्यूची नोंद करण्यात आली आहे.
वाघोली येथील अनुसया पार्कमध्ये पवळे कुटुंब वास्तव्याला आहे. अजय जवळच्याच एका महाविद्यालयात अकरावी इयत्तेत शिक्षण घेत होता. सोमवारी दुपारी घरात कोणी नसताना अजयने गळफास घेऊन आत्महत्या केली. दरम्यान, सायंकाळी अजयची आई कामावरुन घरी परतल्यानंतर आत्महत्येचा प्रकार उघडकीस आला. आत्महत्येची माहिती पोलिसांना कळविण्यात आली. त्यानंतर अजयचा मृतदेह ससून रुग्णालयात शवविच्छेदनासाठी पाठविण्यात आला.
दरम्यान, अजयने कोणत्या कारणासाठी आत्महत्या केली, हे कुटुंबीयांना देखील ज्ञात नाही. या घटनेमुळे कुटुंबाला मोठा धक्का बसला आहे. संबंधित प्रकार उघडकीस आल्यानंतर कुटुंबीयांना धक्का बसला आहे. आत्महत्येमागचे कारण समजू शकले नाही.
