न्हावरे: भरदिवसा घडलेल्या धक्कादायक चोरीच्या (Shirur News) घटनेमुळे मांडवगण फराटा (ता. शिरूर) परिसरात (Pune Crime) एकच खळबळ उडाली आहे. येथील पुष्पा मांगीलाल बोरा ह्या वयोवृद्ध महिला मांडवगण फराटा येथील चौकातून त्यांच्या घरी जात असताना, दुचाकीवर सुसाट वेगाने आलेल्या अज्ञात चोरट्याने त्या वयोवृद्ध महिलेच्या गळ्यातील सुमारे दीड तोळ्याचे सोन्याचे मंगळसूत्र हिसकावले. त्यानंतर तो दुचाकीस्वार चोरटा पसार झाला.
ही घटना बुधवार (ता. 12) रोजी दुपारी दोन वाजण्याच्या सुमारास घडली. मांडवगण फराटा येथील भर चौकामधून पायी जात असताना मागून दुचाकीवर आलेल्या चोरट्याने अचानक वृद्ध महिलेला झडप घालत मंगळसूत्र हिसकावले. यानंतर तो क्षणार्धात दुचाकी वेगाने चालवून फरार झाला.
महिलेने आरडा-ओरड केल्यानंतर येथील नागरिकांनी तत्काळ चोरट्याचा पाठलाग करण्याचा प्रयत्न केला, मात्र दुचाकीवरील मंगळसूत्र चोर सुसाट वेगाने पसार झाला. घटनेची माहिती मिळताच परिसरातील नागरिक घटनास्थळी मोठ्या संख्येने जमा झाले होते.
या चोरीच्या घटनेमुळे मांडवगण फराटा परिसरात भीतीचे आणि असुरक्षिततेचे वातावरण निर्माण झाले आहे. दरम्यान, या प्रकरणी पोलिसांनी तातडीने अज्ञात चोरट्याविरुद्ध गुन्हा दाखल करून तपास सुरू करावा,अशी मागणी स्थानिक नागरिकांनी केली आहे.
