Sandip Kshirsagar on Maratha Reservation Protest : पुणे : राज्यात सध्या मराठा आरक्षण आणि त्यासाठीच आंदोलन जोरदार गाजत आहे. दोन दिवसांपूर्वी आमदार संदीप क्षीरसागर यांच्या घरावर जमावाकडून हल्ला चढवला होता. आक्रमक जमावाने त्यांचा राहता बंगला जाळला, तसेच आवारातही मोठी जाळपोळ केली. मराठा समाजाच्या आंदोलकांनी हे कृत्य केलं असाव असं मत अनेकांकडून व्यक्त करण्यात आलं. त्यावर आता आमदार संदीप क्षीरसागर यांनी भाष्य केलं आहे. याबाबात संदीप क्षीरसागर यांनी फेसबुक पोस्ट करत काही प्रश्न उपस्थित केले आहेत. तसेच, योग्य वेळी पुराव्यानिशी बोलेनं, असंही संदीप क्षीरसागर यांनी म्हटलं आहे.
समाजकंटकांनी घरावर हल्ला केला
संदीप क्षीरसागर यांची फेसबुक पोस्ट : बंगला जाळल्याप्रकरणी आमदार संदीप क्षीरसागर यांनी फेसबुक पोस्टमध्ये म्हटलं आहे की, घरावर हल्ला झाला तेव्हा सर्व कुटुंब घरातच होतं, हल्ला मराठा समाजान किंवा स्थानिक लोकांनी केलेला नसून काही समाजकंटकांनी केला असावा, याबाबत योग्य वेळी पुराव्यानिशी बोलेनं, असं फेसबुक पोस्टमध्ये ते म्हणाले आहेत.”30 ऑक्टोबर 2023 रोजी बीड शहरात अनेक जाळपोळीच्या घटना घडल्या. माझ्या राहत्या घरावर देखील हल्ला झाला. माझे मुल, पत्नी आणि सर्व कुटुंब यावेळी घरातच होते पण मतदारसंघातील आणि जिल्ह्यातील नागरिकांच्या व परमेश्वराच्या आशिर्वादाने आम्ही सर्वजण सुखरूप आहोत.”, असं आमदार संदीप क्षीरसागर यांनी म्हटलं आहे.
मराठा आंदोलकांचे कौतूक : “मराठा समाजाने आरक्षणासाठी अनेक आंदोलने केली. अतिशय शांततेत व शिस्तीत सर्व आंदोलन करणारा माझा मराठा बांधव हिंसक आंदोलन करू शकणार नाही. काल जो प्रकार घडला तो मराठा समाजाने किंवा स्थानिक लोकांनी केलेला नसुन काही समाजकंटकांनी केला असावा. “मराठा आरक्षणासाठी आंदोलन करणाऱ्या मनोज जरांगे पाटील यांच्या तब्येतीची माझ्यासह सर्वांना काळजी आहे. सरकारनं या बाबतीत तातडीनं योग्य आणि सकारात्मक निर्णय घ्यायला हवा. सकल मराठा समाजाला सरसकट कुणबी प्रमाणपत्र व आरक्षण मिळालेच पाहिजे या मागणीला सुरुवातीपासून मी पाठिंबा दिला आहे. मराठा आरक्षणाचा प्रश्न निकाली लावण्यासाठी माझे प्रयत्न असणार आहेत.”, असं संदीप क्षीरसागर यांनी म्हटलं आहे.
