प्रतिनिधी -पोपट पाचंगे
Ranjangao : पंचतारांकित रांजणगाव औद्योगिक वसाहत, ता. शिरूर येथील एमआयडीसीच्या मालकीच्या भूखंडावर करण्यात आलेल्या अनधिकृत अतिक्रमणावर प्रशासनाने अखेर हातोडा फिरविला. या कारवाईचे स्थानिक नागरिकांनी स्वागत करत मोकळा श्वास सोडला.
एमआयडीसीचे प्रवेशद्वार असलेल्या यश इन चौकाजवळील गोवा वाईन्स शेजारी, परंतु एमआयडीसीच्या मालकीच्या असलेल्या भूखंड क्र. A-122 मधील राहण्यासाठीचे पत्र्याचे शेड, टपऱ्या व इतर अनधिकृत बांधकामांवर जिल्हाधिकारी कार्यालय, महसूल प्रशासन व रांजणगाव एमआयडीसी कार्यालय यांच्या संयुक्त विद्यमाने ही धडक कारवाई करण्यात आली.
यावेळी नायब तहसीलदार सुवर्णा खरमाटे, एमआयडीसी प्रादेशिक कार्यालयाच्या एरिया मॅनेजर राजश्री देशमुख, सर्व्हेअर शबाना मुल्ला, रांजणगाव एमआयडीसीचे प्रभारी उपअभियंता नितेश रेबडे, सहाय्यक अभियंता भूषण ठाणगे, अग्निशमन केंद्राचे अग्निशमन अधिकारी पी. व्ही. गुंड, पोलिस निरीक्षक महादेव वाघमोडे, शिरूरचे मंडलाधिकारी सतीश पंचरास, कारेगावचे तलाठी दीपक गांगर्डे आदींसह एमआयडीसीचे कर्मचारी उपस्थित होते.
यावेळी रांजणगावचे पोलिस निरीक्षक महादेव वाघमोडे यांच्या नेतृत्वाखाली चोख पोलिस बंदोबस्त ठेवण्यात आला होता.
येथील एमआयडीसीमधील विविध कंपन्यांमध्ये सुरक्षा रक्षक म्हणून काम करणारे संपत येवले यांनी एमआयडीसीच्या तत्कालीन अधिकाऱ्यांच्या आश्रयामुळे हे अतिक्रमण केल्याची चर्चा होती. येवले यांना हे अतिक्रमण हटविताना वारंवार अभय मिळत होते. परंतु A-122 हा जवळपास चार एकर क्षेत्रफळाचा भूखंड असून, गेल्या 12-13 वर्षांपासून येवले हे सहकुटुंब येथे राहत होते. त्यांनी येथे असलेल्या सहा ते सात टपऱ्यांमधून विविध छोटे-मोठे व्यवसाय सुरू केले होते. तसेच एक मोठे अनधिकृत पत्र्याचे बांधकाम केलेले शेड त्यांनी एका व्यावसायिकाला भाड्याने दिले होते. अखेर आज हे सर्व अतिक्रमण दोन जेसीबीच्या सहाय्याने पाडण्यात आले.
