पुणे: राष्ट्रीय स्तरावरील पुणे ग्रँड चॅलेंज टूर 2026 ही सायकल (Pune Road Diversion) स्पर्धा येत्या जानेवारी 2026 मध्ये होणार आहे. या स्पर्धेसाठी रस्ते सुरळीत आणि सुरक्षित (Pune News) ठेवण्यासाठी महापालिकेकडून व्यापक पायाभूत सुविधा कामे सुरू आहेत. स्पर्धेच्या मुख्य मार्गावरील डांबरीकरण, चेंबर दुरुस्ती, पादचारी मार्गांची सुधारणा आणि इतर आवश्यक कामांसाठी एकूण 145 कोटी 75 लाख 80 हजार रुपये खर्च करण्यात येणार आहेत. (Breaking News)
स्पर्धेच्या पार्श्वभूमीवर वाहतूक सुरळीत राहावी आणि कामात अडथळे येऊ नयेत यासाठी प्रशासनाने तात्पुरत्या वाहतूक बदलांचा निर्णय घेतला आहे. 20 नोव्हेंबर ते 2 डिसेंबर या कालावधीत सकाळी 8 ते रात्री 9 या वेळेत स्पर्धा मार्गावरील वाहतूक पर्यायी मार्गावर वळवली जाईल. सध्या डांबरीकरण युद्धपातळीवर सुरू असून त्याच्या वेगात कोणतीही अडचण निर्माण होऊ नये, यासाठी हे नियोजन करण्यात आले आहे.
मोरगाव ते मुर्टी या मार्गावरील वाहतूक मोरगाव-लोणीपाटी-लोणी भापकर-पेशवे वस्ती (कोऱ्हाळे बु.) -करंजेपूल-सोमेश्वरनगर या मार्गावर वळवली जाईल. मुर्टी ते चौधरवाडी फाटा मार्गावरील वाहतूक मुर्टी-वाकी-करंजे-सोमेश्वरनगर या मार्गे जाईल. चौधरवाडी फाटा ते निरा मार्गावर दुरुस्ती सुरू असल्यामुळे वाहनचालकांनी चौधरवाडी फाटा-करंजे-सोमेश्वर या पर्यायी मार्गाचा वापर करावा.
प्रशासनाने नागरिकांना विनंती केली आहे की या कालावधीत दिलेले पर्यायी मार्ग वापरावेत. स्पर्धेदरम्यान वाहतुकीत अडथळा निर्माण होऊ नये यासाठी वाहनचालकांनी सूचना पाळाव्यात. जिल्हाधिकारी जितेंद्र डूडी यांनीही नागरिकांनी प्रशासनाला सहकार्य करण्याचे आवाहन केले आहे.
