पुणे : महापालिका निवडणुकांसाठी (Pune Politics) आरक्षण सोडत जाहीर होताच (Sharad Pawar) शहरातील राजकीय वातावरण चांगलेच तापले आहे. इच्छुक उमेदवारांमध्ये उत्साह संचारला असून, पक्षांच्या गाठीभेटी, बैठका आणि संभाव्य आघाड्यांबाबत चर्चा रंगू लागल्या आहेत. या पार्श्वभूमीवर राष्ट्रवादी काँग्रेस (शरदचंद्र पवार गट) ची महत्त्वपूर्ण बैठक मंगळवारी पुण्यात झाली. या बैठकीनंतर शहराध्यक्ष प्रशांत जगताप यांनी आगामी निवडणुकीसाठी पक्षाची स्पष्ट भूमिका मांडली.
“पुणे महानगरपालिका निवडणूक आम्ही महाविकास आघाडी म्हणूनच लढवणार आहोत. महायुतीतील कोणत्याही पक्षासोबत उघड किंवा गुप्त युती करायची नाही, हा निर्णय आजच्या बैठकीत ठामपणे घेण्यात आला,” असं प्रशांत जगताप यांनी पत्रकारांशी बोलताना सांगितलं.
गेल्या काही दिवसांपासून राज्यभरात स्थानिक पातळीवर विविध पक्षांमध्ये वेगवेगळ्या आघाड्यांच्या चर्चा सुरू आहेत. कोल्हापूरमध्ये दोन्ही राष्ट्रवादी गट एकत्र येण्याबाबत चर्चांना उधाण आलं असलं, तरी पुण्यात तसं होणार नाही, असं जगताप म्हणाले. “महायुतीने पुण्याचं वाटोळं केलं आहे. त्यांच्या विरोधातच आम्ही लढणार आहोत,” असं ते ठामपणे म्हणाले.
जगताप पुढे म्हणाले, “महाविकास आघाडीतील आमचे भागीदार म्हणजे शिवसेना (उद्धव बाळासाहेब ठाकरे) आणि काँग्रेस आहेत. आम्ही त्यांच्यासोबतच निवडणूक लढवणार आहोत. याबाबत वरिष्ठ नेत्यांशी चर्चा झाली असून, अंतिम निर्णय शरद पवार घेतील.”
दरम्यान, राष्ट्रवादी शरद पवार गटात पुढील काही दिवसांत मोठ्या प्रमाणात ‘इनकमिंग’ होणार असल्याची माहितीही जगताप यांनी दिली. “आमच्याकडे वीस ते पंचवीस नवीन प्रवेश येणार आहेत. मात्र यामुळे कार्यकर्त्यांवर अन्याय होणार नाही. सक्षम कार्यकर्ते असतील, तेथे बाहेरून ‘नवरदेव’ आणायची गरज नाही,” असं त्यांनी स्पष्ट केलं.
उपमुख्यमंत्री अजित पवार यांच्या राष्ट्रवादी पक्षासोबत जाण्याचा कोणताही विचार नाही, असंही त्यांनी स्पष्ट केलं. तसेच राज ठाकरे यांच्या मनसेसोबत आघाडीबाबतचा निर्णयही वरिष्ठ पातळीवरच घेतला जाईल, असं जगताप यांनी सांगितलं. आरक्षण सोडतीनंतर राजकीय समीकरणं नव्याने मांडली जात असतानाच पुण्यातील महापालिका रणसंग्राम अधिकच रोचक होण्याची चिन्हं दिसू लागली आहेत.
