पुणे : पावसाळ्यात निसर्गाचा आनंद घेण्यासाठी तरुण-तरुणी मोठ्या प्रमाणात पुण्यातील बोपदेव घाटात फिरायला जातात. अशातच एक मोठी बातमी समोर येत आहे ती म्हणजेच याच तरूणांकडून एका पोलीस कर्मचाऱ्याने खंडणी घेतल्याचा प्रकार समोर आला आहे. तरुणांना भीती दाखवून पोलिसाने पैसे उकळ्याची बातमी आहे. नेमकं प्रकरण काय? जाणून घेऊया…
बोपदेव घाटात फिरायला गेलेल्या तरुणांची अडवणूक करून पोलीस कर्मचाऱ्याने त्यांच्याकडून पैसे उकळले आहेत. एक तरुण मित्रासोबत फिरण्यास गेला होता. त्यावेळी त्या तरुणाच्या बॅगेत हुक्का पॉट आढळल्यानंतर पोलीस कर्मचाऱ्याने कारवाईची करण्याची धमकी देत तरूणांकडून 28 हजार रुपये खंडणी उकळल्याचा प्रकार घडला आहे.
पोलीस कर्मचाऱ्याने धमकी देऊन खंडणी घेतल्याप्रकरणी कोंढवा पोलीस स्टेशनमध्ये गुन्हा दाखल करण्यात आला आहे. विक्रम लक्ष्मण वडतीले असे पोलीस कर्मचाऱ्याचे नाव आहे. वडतीले यांच्यावर गुन्हा दाखल होताच त्यांना पोलिस खात्यातून निलंबित करण्यात आले आहे.
या प्रकरणी माहिती देताना पोलिसांनी सांगितले की,’ तक्रारदार तरुण हा चेन्नईतील राहणारा असून तो त्याच्या मित्रासह बोपदेव घाट परिसरात फिरण्यासाठी गेला होता. त्यावेळी त्याच्या बॅगेत हुक्का पॉट सापडला. त्यावेळी पोलीस कर्मचाऱ्याने कारवाईची धमकी देत 30 हजार रुपयांची मागणी केली, त्यानंतर पोलीस कर्मचाऱ्याने गुगल पे वरती 28 हजार रुपये स्वीकारले या सगळ्या प्रकरणानंतर तरुणाने कोंढवा पोलीस ठाण्यात तक्रार दिली, त्यानंतर संबंधित पोलीस कर्मचाऱ्यांवर गुन्हा दाखल करण्यात आला, तसेच तातडीने विक्रम लक्ष्मण वडतीले याला सेवेतून निलंबित करण्यात आले आहे.’ असे पोलिसांनी सांगितले आहे.
