अमित मुंडिक
पिंपरी चिंचवड : वाकड ते मामुर्डी दरम्यानच्या (Pune News) सेवा रस्त्यांची पाहणी केल्यानंतर आमदार शंकर जगताप यांनी संबंधित अधिकाऱ्यांना तातडीने काम सुरू करण्याच्या सूचना दिल्या होत्या. त्यानुसार अखेर सेवा रस्त्यांच्या दुरुस्ती आणि डांबरीकरणाच्या कामाला प्रत्यक्ष सुरूवात झाली असून, याबाबत भाजप स्थानिकचे पदाधिकारी राहुल काटे यांनी माहिती दिली आहे.
वाहतुकीला अडथळा ठरणारे होर्डिंग्ज काढणे, अतिक्रमणे हटविणे, सेवा लाईन शिफ्ट करणे आणि मार्ग मोकळा करणे अशी कामे सध्या युद्धपातळीवर सुरू असून, भुजबळ चौक ते भूमकर चौक या भागातील काम जवळ-जवळ पूर्ण झाले आहे. आता उर्वरित सेवा रस्त्यांचे काम जलद गतीने पूर्ण करण्याचे लक्ष्य समोर ठेवून कामाची गती वाढवण्यात अली आहे.
या कामामुळे परिसरातील वाहतूक कोंडीचा मोठा प्रश्न सुटेल आणि नागरिकांना सुलभ, सुरक्षित आणि सुरळीत प्रवास करता येईल. ही कामे नियोजनबद्ध आणि दर्जेदारपणे पूर्ण होण्यासाठी प्रशासनाशी सातत्याने समन्वय ठेवला जात आहे.
दरम्यान, नागरिकांच्या दैनंदिन सोयीसाठी रस्ते सुधारणा हा महत्त्वाचा टप्पा असून, वाकड-मामुर्डी परिसरात या कामामुळे वाहतुकीची परिस्थिती निश्चितच सुधारेल. अशी आशा व्यक्त करण्यात येत आहे.
