पुणे: शहरात पुन्हा एकदा (Pune Crime) गुन्हेगार टोळ्यांचे वर्चस्व वाढत असल्याचे चित्र समोर येत असतानाच पुणे पोलिसांनी (Pune Police) त्यांच्या आर्थिक स्रोतांवर गदा आणण्याची मोहीम हाती घेतली आहे. आंदेकर टोळीच्या अवैध आर्थिक स्रोतांवर आळा घातल्यानंतर आता कुख्यात टिपू पठाण टोळीवर (Tipu Pathan Gang) पोलिसांनी धडक कारवाई केली आहे.
हडपसर परिसरात बनावट कागदपत्रांच्या आधारे जागा बळकावून, बेकायदेशीर बांधकाम करून आणि नागरिकांना लाखो रुपयांचा गंडा घालणाऱ्या या टोळीविरुद्ध मंगळवारी काळेपडळ पोलिस ठाण्याच्या पथकाने मोहीम राबवली. या कारवाईत प्रमुख संशयित रिझवान उर्फ टिपू सत्तार पठाण आणि त्याच्या साथीदारांची बँक खाती गोठवण्यात आली. त्याचबरोबर अनधिकृत बांधकामे पाडण्याची प्रक्रिया महापालिकेने सुरू केली आहे.
या प्रकरणात आरोपी टिपू पठाणसह सादिक कपूर, एजाज पठाण, मेहबूब शेख, जावेद शेख आणि मुनीर शेख यांच्या बँक खात्यांवर बंदी घालण्यात आली आहे. त्यामधील संशयास्पद व्यवहारांची चौकशी गुन्हे शाखा करत आहे. पोलिसांनी तपासादरम्यान आरोपींच्या घरांची झडती घेतली असता, एसी, टीव्ही, फ्रिज, फर्निचर, वॉशिंग मशिन अशा तब्बल 4 ते 5 लाख रुपये किमतीच्या वस्तू आढळल्या. मात्र त्यांची खरीदीची बिले सादर करण्यात कुटुंबीय अपयशी ठरले. त्याचबरोबर दोन नोटरीकृत साठेखतदेखील सापडली असून, त्यांच्या सत्यतेचा तपास सुरू आहे.
पोलिसांनी टिपू पठाणच्या नावावरील लाखो रुपये किमतीची इनोव्हा कारही जप्त केली आहे. ही कार 30 एप्रिलपासून वाघोली येथील टोयोटा शोरूममध्ये सर्विसिंगसाठी ठेवलेली होती.
या टोळीने हडपसरमधील 11 गुंठे जागेची बनावट कागदपत्रे तयार करून ती मालमत्ता बळकावली. जागेवरील कंपाऊंड तोडून त्यांनी बेकायदेशीर बांधकाम उभारलं आणि ती जागा इतरांना वापरासाठी देऊन मोठा आर्थिक फायदा मिळवला. महापालिकेचे पथक आता या अनधिकृत बांधकामांवर पाडकाम करत आहे.
या संपूर्ण कारवाईचे नेतृत्व पोलिस उपायुक्त डॉ. राजकुमार शिंदे यांच्या मार्गदर्शनाखाली सहाय्यक पोलिस आयुक्त धन्यकुमार गोडसे, वरिष्ठ निरीक्षक मानसिंग पाटील आणि पोलिस निरीक्षक अमर काळंगे यांच्या पथकाने केले. डॉ. शिंदे म्हणाले, “बनावट दस्तऐवजांच्या आधारे नागरिकांची फसवणूक करणाऱ्यांवर कोणताही सौम्यपणा दाखवला जाणार नाही. अशा सर्व गुन्हेगारांविरुद्ध कठोर कारवाई केली जाईल.”
हडपसरमधील या फसवणूक प्रकरणामुळे स्थानिक नागरिक भयभीत झाले होते. मात्र पोलिसांनी केलेल्या कारवाईमुळे नागरिकांमध्ये दिलासा मिळाला असून, पोलिसांच्या धडक मोहिमेचं मोठ्या प्रमाणावर कौतुक होत आहे.
