अमित मुंडीक
पुणे: काळेपडळ पोलिस (Pune Crime) ठाण्याच्या तपास पथकाने (Pune News) केवळ 24 तासांत दोन ऑटो रिक्षा, टायर आणि स्टेफनी चोरी करणाऱ्या चोरट्याला बेड्या ठोकल्या आहेत. एकूण 2,56,000 रुपये किमतीचा मुद्देमाल पोलिसांनी जप्त केला आहे. काळेपडळ पोलीस ठाण्यात गुन्हा रजि. क्र. 395/2025, बीएनएस कलम 303(2) अंतर्गत तपास सुरू असताना तपास पथकातील अमित शेटे, सहाय्यक पोलीस निरीक्षक, पो.हवा. प्रविण काळभोर, दाऊद सय्यद, प्रतिक लाहिगुडे, श्रीकृष्ण खोकले, सद्दाम तांबोळी, महादेव शिंदे, अतुल पंधरकर, शाहीद शेख, विशाल ठोंबरे, लक्ष्मण काळे व नितीन ढोले हे पोलीस हद्दीत पेट्रोलिंग करत होते.
त्यावेळी पोलीस अंमलदार शाहिद शेख व अतुल पंधरकर यांना खात्रीशीर बातमी मिळाली की, एक इसम चोरीचे रिक्षाचे टायर घेऊन लक्ष्मीपार्क परिसरात गौरी हॉटेलजवळ उभा आहे. तत्काळ पोलिसांनी छापा टाकून त्या इसमाला ताब्यात घेतले. त्याची चौकशी केली असता त्याचे नाव शादाब युसुफ अन्सारी (वय 20, रा. सय्यदनगर, हडपसर, पुणे) असे आढळले. पंचासमक्ष तपासणी केली असता त्याच्याकडे दोन ऑटो रिक्षा, टायर आणि स्टेफनी असा एकूण 2,56,000 रुपये किंमतीचा मुद्देमाल मिळून आला. यात उत्तमनगर, वाकड आणि काळेपडळ पोलीस ठाण्यातील चोरीच्या रिक्षांचा समावेश आहे. या कारवाईत बजाज कंपनीच्या काळ्या-पिवळ्या रंगाच्या दोन रिक्षा (MH-12 QE-7701 आणि MH-14 HM-7375) तसेच 12 टायर आणि एक स्टेफनी पोलिसांनी जप्त केली आहेत.
