Pune News : पुणे महापालिकेच्या हद्दीत नव्याने समाविष्ट झालेल्या सिंहगड रस्ता परिसरातील धायरी गावात मिळकत कर आकारणीच्या धोरणामध्ये मोठी विसंगती दिसून येत आहे. महापालिकेने एकाच गावातील काही मालमत्तांसाठी शहराच्या मुख्य भागाप्रमाणे जास्त दराने कर आकारला आहे, तर त्याच परिसरातील इतर काही मालमत्तांसाठी ग्रामीण भागाप्रमाणे कमी दराने कर आकारणी केली आहे.
या दुहेरी धोरणामुळे धायरीतील रहिवाशांमध्ये तीव्र संताप व्यक्त होत आहे. नागरिकांना त्यांच्या मालमत्तांसाठी अवास्तव आणि मोठ्या रकमेची कर बिले मिळाल्यामुळे ते संभ्रमात पडले आहेत. अनेक मालमत्तांच्या नोंदीमध्ये अनियमितता असून, एकाच भूखंडावरील शेजारच्या दोन मालमत्तांच्या कराच्या दरात मोठी तफावत आढळत आहे.
महापालिका प्रशासनाच्या चुकीच्या नोंदी आणि धोरणात्मक त्रुटींमुळे हा प्रकार घडल्याचा आरोप नागरिक करत आहेत. या गंभीर विसंगतीची महापालिकेच्या वरिष्ठ अधिकाऱ्यांनी त्वरित दखल घेऊन चौकशी करावी आणि धायरी गावासाठी एकसमान तसेच न्यायपूर्ण कर धोरण त्वरित लागू करावे, अशी मागणी नागरिक करत आहेत. जर या समस्येवर त्वरित उपाययोजना झाली नाही, तर तीव्र आंदोलन छेडण्याचा इशाराही स्थानिक रहिवाशांनी दिला आहे.
