Pune News : पुण्यातील पाषाण तलावात मोठ्या प्रमाणावर मासे आणि जलचर मृत आढळल्यानंतर पुणे महापालिकेने 4 अधिकाऱ्यांना निलंबित केले आहे. या प्रकरणी महापालिका आयुक्तांनी कारवाई करत संबंधित विभागातील निष्काळजीपणावर ठपका ठेवला. तसेच मुख्य अभियंत्याला कारणे दाखवा नोटीस बजावण्यात आली आहे.
महापालिकेने मलनिस्सारण आणि औंध-बाणेर क्षेत्रीय कार्यालयातील अधिकाऱ्यांवर कारवाई केली आहे. अजयकुमार वायसे (कार्यकारी अभियंता), अतुलकुमार कट्स (कनिष्ठ अभियंता), विजय भोईर आणि विनायक चोपडे (आरोग्य निरीक्षक) यांना निलंबित करण्यात आले आहे. मलनिस्सारण व देखभाल दुरुस्ती विभागाचे मुख्य अभियंता जगदीश खानोरे यांना नोटीस देण्यात आली आहे.
तपासात पाषाण तलावाजवळ उभारण्यात आलेला 1 एमएलडी क्षमतेचा सांडपाणी प्रक्रिया प्रकल्प पूर्ण क्षमतेने कार्यरत नसल्याचे समोर आले. प्रक्रिया न केलेले सांडपाणी थेट तलावात सोडले जात असल्याचे आढळले. यामुळे पाण्यातील ऑक्सिजनची पातळी घटली आणि मोठ्या प्रमाणात मासे मृत झाले.
या घटनेनंतर स्थानिक नागरिकांकडून तक्रारी करण्यात आल्या होत्या. त्यानंतर महापालिकेने चौकशी करून संबंधित अधिकाऱ्यांवर कारवाई केली.
