पुणे: पुण्यातील शनिवार वाडा (Pune News) परिसरात नमाज पठण (Shanivar Wada) झाल्याचा व्हिडीओ समोर आल्यानंतर वाद निर्माण झाला आहे. हा व्हिडीओ भाजप खासदार मेधा कुलकर्णी यांनी त्यांच्या सोशल मीडियावर शेअर केला असून, त्यानंतर या घटनेवरून सकल हिंदू समाज आणि पतित पावन संघटनेने तीव्र निषेध व्यक्त केला आहे.
मेधा कुलकर्णी यांनी इन्स्टाग्रामवर शेअर केलेल्या या व्हिडीओमध्ये काही व्यक्ती शनिवार वाडा परिसरात नमाज पठण करताना दिसत आहेत. या पार्श्वभूमीवर त्यांनी संबंधित घटनेबाबत संताप व्यक्त केला असून, पुण्यातील ऐतिहासिक आणि धार्मिक दृष्ट्या संवेदनशील स्थळी अशा प्रकारे नमाज पठण होणे अयोग्य असल्याचे मत व्यक्त केले आहे.
या घटनेच्या निषेधार्थ सकल हिंदू समाज आणि पतित पावन संघटनेने आज, 19 ऑक्टोबर रोजी सायंकाळच्या सुमारास शनिवार वाड्याजवळ शिव वंदना आयोजित केली आहे. या कार्यक्रमाद्वारे संबंधित संघटनांनी हिंदू समाजाच्या भावना व्यक्त करण्याचा निर्धार केला आहे.
मेधा कुलकर्णी यांनी आपल्या सोशल मीडियावर यासंबंधी माहिती देत सांगितले की, शनिवार वाडा हा छत्रपती शिवरायांच्या इतिहासाशी संबंधित पवित्र स्थळ आहे. त्यामुळे या ठिकाणी अशा प्रकारचे धार्मिक कृत्य करणे अयोग्य आहे आणि प्रशासनाने याकडे गांभीर्याने पाहावे, अशी मागणी त्यांनी केली आहे.
दरम्यान, या घटनेमुळे शनिवार वाडा परिसरात तणावपूर्ण वातावरण निर्माण झाले असून, पोलिसांनी सावधगिरीचा उपाय म्हणून परिसरात बंदोबस्त वाढवला आहे. प्रशासनाने नागरिकांना शांतता आणि कायदा-सुव्यवस्था राखण्याचे आवाहन केले आहे.
