पुणे: काही दिवसांपूर्वी कोथरूड (Pune News) परिसरातील श्री सुवर्ण सोसायटीत (Pune Police) घरफोडीचा प्रयत्न झाला होता. त्या वेळी चोरट्यांनी थेट सोसायटीच्या सीसीटीव्ही कॅमेऱ्यासमोर पिस्तूल दाखवून दहशत माजवली होती. मात्र, त्यानंतर कोथरूड पोलिसांनी पत्रकार परिषदेत “कॅमेऱ्यात दिसलेली वस्तू पिस्तूल नसून पिस्तूलासारखा दिसणारा लायटर आहे” असा ठाम दावा केला होता. त्यामुळे या घटनेवर पडदा पडल्यासारखे वाटत असतानाच आता हडपसर पोलिसांनी या प्रकरणाला नवा वळण दिला आहे.
हडपसर पोलिसांनी वाहन चोरीप्रकरणी दोन अल्पवयीन तरुणांना ताब्यात घेतले. त्यांच्याकडून तपासादरम्यान एक देशी बनावटीचे पिस्तूल आणि एक जिवंत काडतूस जप्त करण्यात आले. यातील एक आरोपी हा नेमका कोथरूडमधील घरफोडी प्रकरणात सीसीटीव्हीत दिसणारा मुलगा असल्याचे पोलिस तपासात उघड झाले आहे. म्हणजेच, कोथरूडमध्ये ज्यावेळी तो कॅमेऱ्यासमोर आला, तेव्हा त्याने खरेच पिस्तूल दाखवले होते, लायटर नव्हे.
२ ऑक्टोबर रोजी कोथरूडमधील श्री सुवर्ण सोसायटीत हा प्रकार घडला होता. त्या दिवशी चोरट्यांनी सोसायटीत शिरून घरफोडीचा प्रयत्न केला आणि रहिवाशांना धमकावण्यासाठी कॅमेऱ्यात पिस्तूल व इतर हत्यारे दाखवली. घटनेनंतर नागरिकांमध्ये भीतीचे वातावरण निर्माण झाले होते. परंतु कोथरूड पोलिसांनी माध्यमांना दिलेल्या माहितीत “प्रकरण गंभीर नाही, नागरिकांनी घाबरू नये” असे सांगत हात झटकले होते.
मात्र, अवघ्या सहा दिवसांत हडपसर पोलिसांच्या कारवाईमुळे हा पोलिसांचा दावा चुकीचा ठरला आहे. वाहन चोरीच्या गुन्ह्यांमध्ये अटक केलेल्या अल्पवयीनांकडून एकूण ८ वाहनचोरीचे गुन्हे उघडकीस आले आहेत. त्यांच्याकडे मिळालेल्या पिस्तुलानेच कोथरूडमध्ये दहशत माजवण्यात आल्याचे आता स्पष्ट झाले आहे.
हडपसर पोलिसांच्या या तपासामुळे केवळ घरफोडी प्रकरणाचा उलगडा झाला नाही, तर कोथरूड पोलिसांचा निष्काळजीपणा आणि चुकीचा दावा देखील उघडकीस आला आहे. या घटनेमुळे पुणे पोलिसांच्या तपासपद्धतीवरही प्रश्नचिन्ह उपस्थित झाले आहे. पुढील काळात या अल्पवयीनांना न्यायालयीन प्रक्रियेनंतर सुधारगृहात ठेवण्याची शक्यता आहे.
