पुणे : पुणे-नाशिक महामार्गावरील नारायणगाव बायपासजवळ आज सकाळी एका गॅस वाहतूक करणाऱ्या टँकरमधून मोठ्या प्रमाणात गॅस गळती (Gas Tanker Leak) सुरू झाल्याची बातमी समोर आली आहे. याचा एक व्हिडीओ देखील समोर आला असून, या घटनेनंतर परिसरात भीतीचे वातावरण निर्माण झाले आहे. टँकरमधून होणाऱ्या गॅस गळतीबाबत चालकाच्या लक्षात आल्यानंतर तातडीने टँकर रस्त्याच्या कडेला उभा केल्याने पुढील अनर्थ टळला आहे. या घटनेची माहिती मिळताच वाहतूक पोलीस घटनास्थळी दाखल झाले आहेत.
सकाळी 10 च्या सुमारास ही घटना घडली. सुरुवातीला कमी प्रमाणात गॅस गळत होता, मात्र नंतर त्याचे प्रमाण वाढले. गॅसचा वास सर्वत्र पसरल्याने महामार्गावरील वाहनचालक आणि परिसरातील नागरिक घाबरून गेले आहेत.
गॅस गळतीमुळे महामार्गावरील वाहतुकीवर परिणाम झाला असून, सध्या गळतीवर नियंत्रण मिळवण्याचे प्रयत्न सुरू आहेत, मात्र गॅस गळती सुरू असताना सुरक्षेच्या पुरेशा उपाययोजना नसल्याने प्रवाशांमध्ये आणि स्थानिक नागरिकांमध्ये चिंतेचे वातावरण आहे. या घटनेमुळे सीएनजी (CNG) आणि इतर गॅस वाहतूक करणाऱ्या वाहनांच्या सुरक्षिततेचा प्रश्न पुन्हा एकदा चर्चेत आला आहे. या गळतीचे नेमके कारण अद्याप स्पष्ट झालेले नाही.
