Pune News : पुण्यातील वर्दळीच्या गांजवे चौकात आज एक विचित्र अपघात घडला. एका कार चालकाच्या निष्काळजीपणामुळे दोन मिनी बस एकमेकांवर आदळल्या आणि गोंधळाची परिस्थिती निर्माण झाली. (Pune News)
मिळालेल्या माहितीनुसार, गांजवे चौकातून जात असताना एका कार चालकाने कोणताही सिग्नल न देता अचानक भररस्त्यात ब्रेक दाबला. त्यामुळे कारच्या अगदी मागे असलेल्या मिनी बसच्या चालकाला जोरात ब्रेक मारावा लागला. मात्र त्या बसच्या पाठीमागून येणाऱ्या दुसऱ्या मिनी बस चालकाला वेळेत थांबता आलं नाही आणि त्याची बस थेट पुढील बसवर धडकली.
ही धडक जोरदार असल्याने दोन्ही बसचे मोठ्या प्रमाणात नुकसान झाले. अपघातात बसमधील काही प्रवासी जखमी झाले, तर अनेक प्रवासी प्रचंड घाबरले.
अपघातासाठी कार चालक जबाबदार असल्याचं लक्षात येताच संतप्त प्रवासी बसमधून खाली उतरले. त्यांनी कार चालकाला जाब विचारायला सुरुवात केली. सुरुवातीला वाद झाला आणि पाहता पाहता बाचाबाचीचं रूप घेतलं. संतापलेल्या प्रवाशांनी कार चालकाला रस्त्यावरच मारहाण केल्याचंही पाहायला मिळालं.
या अपघातामुळे गांजवे चौकात मोठी गर्दी जमली होती. अपघात आणि त्यानंतर झालेल्या गोंधळामुळे काही काळ या परिसरातील वाहतूक पूर्णपणे ठप्प झाली होती.
